ەلىمىزدە سۇيىتىلعان گاز باعاسى قىمباتتايدى

1 شىلدەدەن باستاپ قازاقستاننىڭ جانارماي قۇيۋ بەكەتتەرىندە سۇيىتىلعان گاز باعاسى قىمباتتايدى.

اتاپ ايتقاندا، سۇيىتىلعان مۇناي گازىن بولشەك ساۋدادا وتكىزۋ باعاسىن رەسپۋبليكا بويىنشا قوسىمشا قۇن سالىعىن قوسقاندا 1 ليترىنە 4 نەمەسە 6 تەڭگەگە كوتەرۋ ۇسىنىلدى، دەپ حابارلايدى Almaty-akshamy.kz.

ق ر «گاز جانە گازبەن جابدىقتاۋ تۋرالى» زاڭىنىڭ 20-بابىنىڭ 5-تارماعىنا سايكەس، 2023 جىلعى 1 شىلدەدەن باستاپ ەنەرگەتيكا مينيسترلىگى اۆتوگازدىڭ كوتەرمە باعاسىن 33 600 تەڭگەدەن 40 320 تەڭگەگە دەيىن كوتەرۋدى جوسپارلاپ وتىر.

وسىلايشا، استانادا اۆتوگاز باعاسى ليترىنە 70 تەڭگەدەن 76 تەڭگەگە، الماتىدا 75 تەڭگەدەن 81 تەڭگەگە، شىمكەنتتە 60 تەڭگەدەن 64 تەڭگەگە دەيىن كوتەرىلەدى. وڭىرلەردە اۆتوگاز باعاسى وبلىستىڭ شالعايلىعىنا بايلانىستى وزگەرىپ وتىرادى.

ماسەلەن، شىعىس قازاقستان وبلىسىندا 70-75 تەڭگەدەن 76-81 تەڭگەگە دەيىن، اتىراۋ وبلىسىندا 50-55 تەڭگەدەن 54-59 تەڭگەگە، الماتى وبلىسىندا 75-80 تەڭگەدەن 81-86 تەڭگەگە دەيىن، سولتۇستىك قازاقستان وبلىسىندا 75-80 تەڭگەدەن 81-86 تەڭگەگە دەيىن، ماڭعىستاۋ وبلىسىندا 50-55 تەڭگەدەن 54-59 تەڭگەگە دەيىن قىمباتتايدى.

قۇجات 12 شىلدەگە دەيىن اشىق نقا سايتىندا ورنالاستىرىلعان.