ەلىمىزدە ستۋدەنتتەرگە بەرىلەتىن گرانت كوبەيەدى

2024 جىلى 180 مىڭ ستۋدەنت جوعارى ستيپەنديا الادى.

بۇل تۋرالى ماجىلىستە «2024 – 2026 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىن تانىستىرۋ كەزىندە قارجى ۆيسە-مينيسترى ابزال بەيسەنبەك ۇلى ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«جالپى، ەلىمىزدە شەتەلدىك جوعارى ءبىلىمدى الۋعا مۇمكىندىك جاساۋ باعىتىندا شەتەلدىك جوعارى وقۋ ورىندارىنىڭ فيليالدارىندا وقۋعا جىل سايىن 1 700 ستۋدەنتتى قابىلداۋ كوزدەلگەن. سايكەسىنشە قاراجات قاراستىرىلعان. كادرلاردى دايارلاۋ بويىنشا بيىلعا قاراعاندا 2024 جىلى 5 مىڭ قوسىمشا گرانت بەرۋ جوسپارلانعان، 180 مىڭ ستۋدەنت جوعارىلاتىلعان ستيپەنديا الادى»، - دەدى ا. بەيسەنبەك ۇلى.

ونىڭ ايتۋىنشا، 15 مىڭعا جۋىق ستۋدەنتتى جاتاقحانادا ورىنمەن قامتاماسىز ەتۋگە 2024 جىلعا 6 ملرد تەڭگە قاراستىرىلعان.

«سونىمەن قاتار، 4 مىڭ جەتىم بالا مەن مۇمكىندىگى شەكتەۋلى ادامدارعا جاتاقحانالاردا تۇرعانى ءۇشىن وتەماقى تولەۋ قاراستىرىلعان. بۇعان 2024-2026 جىلدارعا 1،2 ملرد تەڭگە سوماسىندا قاراجات بولىنبەك. ال عىلىمدى قارجىلاندىرۋ كولەمى اعىمداعى جىلدىڭ دەڭگەيىنەن 50 پايىزعا ارتىپ، 242 ملرد تەڭگەنى قۇرايدى. بۇل 616 جەتەكشى عالىمنىڭ ەڭبەكاقىسىن ۇلعايتۋعا، ىرگەلى زەرتتەۋلەرمەن اينالىساتىن 11 عىلىمي زەرتتەۋ ينستيتۋتىن قارجىلاندىرۋمەن قامتاماسىز ەتۋگە مۇمكىندىك بەرەدى. مۇنىمەن قوسا، 720 جاس عالىم الەمنىڭ جەتەكشى عىلىمي ورتالىقتارىندا تاعىلىمدامادان وتەتىن بولادى»، - دەدى ۆيسە-مينيستر.