قازاقستاندا 120 سپورت تۇرىنە قارجى ءبولۋ توقتايدى.
تۋريزم جانە سپورت ءمينيسترى ەربول مىرزابوسىنوۆ ەلىمىزدە تىركەلگەن 180 سپورت ءتۇرىنىڭ 60 ءتۇرى عانا باسىمدىقپەن قارجىلاندىرىلاتىنىن مالىمدەدى، دەپ حابارلايدى aqshamnews.kz
دەپۋتات ەرلان سايروۆ قازاقستاندا تىركەلگەن 180 سپورت ءتۇرىنىڭ قازاقستان ازاماتتارى ءۇشىن بەلگىسىز ەكەنىن اتاپ ءوتتى.
"قازاقستاندا 180 سپورت ءتۇرى تىركەلگەن. مىسالى، بياتلون، ترياتلون، پەتانك، ۋنيفايت. بۇل سپورت تۇرلەرىن حالىق تانىمايدى. ولاردى تىركەۋدىڭ جانە قارجىلاندىرۋدىڭ ماڭىزى قانشا؟ ۇلىبريتانيادا 15، گەرمانيادا 17 سپورت ءتۇرى تىركەلگەن، ولار بيۋدجەتتەن قارجىلاندىرىلادى. ال قازاقستاندا 180 سپورت ءتۇرى قارجىلاندىرىلىپ وتىر. مۇنى قالاي تۇسىندىرۋگە بولادى؟ بۇل قانداي كەڭپەيىلدىك؟" – دەپ سۇرادى دەپۋتات.
مينيستر ەربول مىرزابوسىنوۆ بۇل ماسەلەنىڭ سپورت سالاسىنداعى پروبلەمالاردىڭ ءبىرى ەكەنىن راستادى.
"180 سپورت ءتۇرىنىڭ ىشىنەن ءبىز وسى زاڭ جوباسى اياسىندا باسىم سپورت تۇرلەرىن انىقتاپ جاتىرمىز. بۇل 60 سپورت ءتۇرى – ۇلتتىق سپورت تۇرلەرى مەن وليمپيادا، پاراليمپيادا، سۋردليمپيادا، ازيا جانە پاراازيالىق ويىندارعا كىرەتىن 45 سپورت ءتۇرى. ءبىز ولاردى باسىم سپورت تۇرلەرى رەتىندە بەكىتەمىز"، – دەپ مالىمدەدى مينيستر.
سونىمەن قاتار ول بولاشاقتا قارجىلاندىرۋ ءۇشىن باسىم سپورت تۇرلەرى مەدالداردى ۇتىپ الۋ كورسەتكىشتەرى بويىنشا انىقتالاتىنىن ايتتى.
"ولار رەسپۋبليكالىق جانە جەرگىلىكتى دەڭگەيدە باسىمدىقپەن قارجىلاندىرىلادى. سپورتتى قارجىلاندىرۋ ماسەلەلەرى سوڭعى رەت پاريج وليمپياداسىنان كەيىن ەرەكشە نازارعا الىندى"، – دەدى سپورت ءمينيسترى.