وندا 55 مىڭ وقۋشى ءبىلىم الادى
قازاقستاندا سوڭعى ءۇش جىلدا 41 ىت-مەكتەپ اشىلدى. بۇل تۋرالى وقۋ-اعارتۋ ۆيسە-مينيسترى عاني بەيسەمبايەۆ ورتالىق كوممۋنيكاسيالار قىزمەتىندە وتكەن بريفينگتە ءمالىم ەتتى، دەپ حابارلادى Almaty-akshamy.kz Elorda.info-عا سىلتەمە جاساپ.
«ىت-مەكتەپتەر زاماناۋي جابدىقتارمەن جانە روبوتوتەحنيكا كابينەتتەرىمەن جابدىقتالعان. وندا 55 مىڭ وقۋشى وقيدى. بۇل وتكەن جىلعا قاراعاندا 3 مىڭ بالاعا ارتىق»، - دەدى ۆيسە-مينيستر.
ۆەدومستۆو وكىلىنىڭ ايتۋىنشا، بۇدان بولەك مامانداندىرىلعان مەكتەپتەردىڭ سانى دا ارتقان. بۇگىندە ولاردىڭ سانى 134-كە جەتتى.
«مامانداندىرىلعان مەكتەپتەردە 72 مىڭنان استام بالا وقيدى. العاش رەت الەۋمەتتىك وسال توپ وقۋشىلارىن قولداۋ ماقساتىندا شىققان مينيسترلىك بۇيرىعى نەگىزىندە مامانداندىرىلعان مەكتەپتەرگە ءتۇسۋ ءۇشىن وسىنداي ساناتقا 15% كۆوتا بولىنگەن بولاتىن. الەۋمەتتىك وسال وتباسىلاردان شىققان 421 بالا العاش رەت دارىندى بالالارعا ارنالعان 71 مەكتەپتە تالانتتى بالالارمەن قاتار وقۋ مۇمكىندىگىنە يە بولدى»، - دەپ اتاپ ءوتتى عاني بەيسەمبايەۆ.