جاۋىنگەرلەر اراسىندا پسيحولوگيالىق ساۋالناما مەن الەۋمەتتىك زەرتتەۋ جۇمىستارىن جۇرگىزۋى كەرەك
اسكەري بولىمدەردە الىمجەتتىك جويىلماي تۇر. ايدىڭ كۇننىڭ امانىندا ساربازداردىڭ ءبىرى ارباعا تاڭىلسا، وزگەسى تابىتپەن ورالىپ جاتىر، دەپ حابارلايدى Almaty-akshamy.kz «حابار 24» تەلارناسىنا سىلتەمە جاساپ.
رەسمي دەرەكتەرگە سۇيەنسەك، سوڭعى 10 جىلدا 220 اسكەري قىزمەتكەر وز-وزىنە قول سالعان. ال وسى ماسەلەگە قاتىستى تىلشىلەرىمىزدىڭ قورعانىس مينيسترلىگىنە ءبىر اپتا بۇرىن جولداعان ساۋالىنا ءالى جاۋاپ كەلگەن جوق. جىل سايىن ەلىمىزدە 200 مىڭنان استام جىگىت اسكەرگە شاقىرىلادى. ونىڭ تەك تورتتەن ءبىرى سارباز اتانادى، وسىعان قاراپ جاۋىنگەر بولۋدان جالتارىپ جۇرگەندەردىڭ قاتارى تىم كوپ ەكەنىن ۇعامىز. 30 مىڭنان استام ادام ءار ءتۇرلى سەبەپ-سىلتاۋمەن بوي تاسالاپ كەلەدى. دەنساۋلىعىندا كىنارات بولماسا، ولاردىڭ بۇل ارەكەتىن قالاي تۇسىنۋگە بولادى؟ بۇل ساۋالعا اتا-انالاردىڭ ءوز جاۋابى بار سياقتى.
بەيبىت كەزدە بەلگىسىز جاعدايدا جاس جىگىتتەردىڭ وپات بولىپ جاتقانى وكىنىشتى. بىلتىر جازدا «ورالدا كۇزەتتە تۇرعان سارباز وز-وزىنە قول سالدى» دەگەن اقپاراتتى ەستىدىك. راسىمەن سۋيسيد بولا ما، جوق پا بەلگىسىز. وسىدان تۋرا ەكى اپتا بۇرىن قاتارداعى جاۋىنگەر الىبەك قالباي وتارداعى اسكەري قالاشىقتا قايتىس بولدى. ونىڭ ءولىمى بويىنشا كۇدىكتى سارباز ۇستالىپ، تەرگەۋ جۇمىستارى ءجۇرىپ جاتقانىن ايتتىق.
«زاڭ بويىنشا قازىرگى وتباسىنا تولەماقى بار. 500 اەك جانە ەسكەرتكىش-قۇلپىتاس قويۋ ءۇشىن 80 اەك. سونداي-اق جەكە قۇرامنىڭ اتىنان دا كومەك كورسەتىلدى. اقشالاي دا، باسقالاي دا كومەك كورسەتىلىپ جاتىر»،-دەيدى ق ر قك باس شتابى باستىعىنىڭ ورىنباسارى سەرىك بورانبايەۆ.
اسكەري ساراپشى ەرمەك سەيىتباتتالوۆتىڭ ايتۋىنشا، اسكەردەگى الىمجەتتىك بوس ۋاقىتتىڭ كوپتىگىنەن پايدا بولادى. مۇنىڭ الدىن الۋ ءۇشىن ساربازدارعا بەرىلەتىن ءۇزىلىس مەرزىمىن قىسقارتۋ كەرەك. بار نازارىن تەك اسكەري دايىندىققا اۋدارۋ قاجەت، دەيدى وتستاۆكاداعى پولكوۆنيك.
«اسكەرگە كەلگەن جىگىتتەرگە باسىنان باستاپ قاتتى تالاپ قويۋ كەرەك. سونان كەيىن ولاردى بىردەن جاۋىنگەرلىك دايارلىققا، وتە تىعىز شارالارعا قويۋ كەرەك. سوندا ولاردىڭ باسقا دۇنيەلەرگە بارا المايدى، ۋاقىت تابا المايدى جانە بار نازارى تەك جاۋىنگەرلىك دايارلىققا اۋدارىلادى»، -دەدى اسكەري ساراپشى ەرمەك سەيىتباتتالوۆ.
الىمجەتتىك كوبەيسە، اسكەري ءبولىم شايقاس الاڭىندا جەڭىسكە جەتە المايدى دەيدى ەرمەك سەيىتباتتالوۆ. ساراپشى رۋستام بۋرناشيەۆ تا بۇل پىكىرمەن كەلىسەدى.
«ءبىزدىڭ ساربازدار اراسىندا وڭىرشىلدىك بار ما، جوق پا بىلمەدىم. ءبىراق الىمجەتتىك دەڭگەيى جوعارى سانالاتىن كەز كەلگەن اسكەري ءبولىمنىڭ شايقاس الاڭىنداعى الەۋەتى ءالسىز دەگەن تۇسىنىك بار. بۇل ءبىر تاريحي فاكتىلەرگە نەگىزدەلگەن الەمدىك تاجىريبەدە بار ۋاقيعا بولسا تاڭ قالمايمىن. ماسەلەن، يزرايل مەن شۆەيساريا اسكەرىندە ىشكى ءتارتىپ ەرەجەسى قاتاڭ ساقتالادى. ول جاقتا جاۋىنگەرلىك مىندەتتەن تىس ارەكەتكە بارۋ كورسەتكىشى وتە تومەن. ءبىراق اسكەري ناتيجەسى جوعارى»،-دەيدى اسكەري ساراپشى رۋستام بۋرناشيەۆ.
رۋستام بۋرناشيەۆتىڭ سوزىنە سۇيەنسەك، اسكەردەگى الەكتىڭ جاي-جاپسارىن انىقتاۋ ءۇشىن قورعانىس مينيسترلىگى جاۋىنگەرلەر اراسىندا پسيحولوگيالىق ساۋالناما مەن الەۋمەتتىك زەرتتەۋ جۇمىستارىن جۇرگىزۋى كەرەك. تەك سول كەزدە كەتكەن كەم-كەتىك سالدارىن جويۋعا بولادى، دەيدى مامان.