بۇل تۋرالى ادىلەت ءمينيسترى ازامات ەسقارايەۆ ايتتى.
كەلەسى جىلى جالپى 16 زاڭ جوباسىن ازىرلەۋ جوسپارلانعان، دەپ حابارلايدى Almaty-akshamy.kz
جوسپار جوباسىنا سايكەس كەلەسى جىلى سيفرلىق تەحنولوگيالاردى، الەۋمەتتىك سالانى، زياتكەرلىك مەنشىك سالاسىن، يننوۆاسيالىق قىزمەتتى، عارىش سالاسىن جانە باسقا دا سالالاردى دامىتۋ سياقتى وزەكتى باعىتتار بويىنشا 16 زاڭ جوباسىن ازىرلەۋ كوزدەلگەن.
"جوسپارلانعان 16 زاڭ جوباسىنىڭ ىشىنەن 2 زاڭ جوباسى بۇرىن رەتتەلمەگەن قوعامدىق قاتىناستاردى رەگلامەنتتەۋگە باعىتتالاتىن بولادى (سيفرلىق كودەكس جانە "نىسانالى كاپيتال قورلارى (ەنداۋمەنت-قورلار) تۋرالى"). مەملەكەت باسشىسى "Digital Bridge 2023" فورۋمىندا سويلەگەن سوزىندە الەمدىك وزىق تاجىريبەگە جاۋاپ بەرەتىن، نارىقتىڭ قاجەتتىلىكتەرىن دە، ازاماتتاردىڭ مۇددەلەرىن دە ەسكەرەتىن، زاماناۋي قۇقىقتىق رەتتەۋشى بازانى، ونىڭ ىشىندە سيفرلىق كودەكس جوباسىن دا ازىرلەۋ جونىندە اۋقىمدى مىندەت قويدى. ۋاقىت تالاپتارىنا سايكەس ءبىلىم جانە عىلىم سالاسىن دامىتۋ جانە ۋنيۆەرسيتەتتەردى تۇراقتى قارجىلاندىرۋدى قامتاماسىز ەتۋ ماقساتىندا نىسانالى كاپيتال قورى تۋرالى زاڭ جوباسىن ازىرلەۋ ۇسىنىلادى"، - دەدى مينيستر.
بۇدان بولەك ءبىرقاتار زاڭ جوباسى 2030 جىلعا دەيىنگى قۇقىقتىق ساياسات تۇجىرىمداماسىنان تۋىندايدى. وعان جەر قويناۋىن پايدالانۋ ماسەلەلەرى جونىندەگى زاڭنامانى جەتىلدىرۋ كىرەدى.
"قىلمىستىق جولمەن الىنعان كىرىستەردى زاڭداستىرۋعا جانە تەرروريزمدى قارجىلاندىرۋعا قارسى ءىس-قيمىل ماسەلەلەرى بويىنشا زاڭ جوباسىن ازىرلەۋ قارجىلىق مونيتورينگتى دامىتۋدىڭ 2022-2026 جىلدارعا ارنالعان تۇجىرىمداماسىنان تۋىندايدى. بۇدان بولەك جوسپاردىڭ جوباسى رەسپۋبليكالىق بيۋدجەت جانە ۇلتتىق قوردان كەپىلدەندىرىلگەن ترانسفەرت تۋرالى جىل سايىنعى نەگىزدە ازىرلەنەتىن زاڭ جوبالارىن كوزدەيدى"، - دەدى ازامات ەسقارايەۆ.
ۆەدومستۆو باسشىسى "قۇقىقتىق اكتىلەر تۋرالى" زاڭعا سايكەس جوسپاردىڭ جوباسىن مەملەكەت باسشىسىمەن كەلىسۋگە جىبەرۋ ۇسىنىلاتىنىن دا باسا ايتتى.