قازاقستاندىق تۇتىنۋشىلارعا دا ليميت قويىلدى
بۇگىننەن باستاپ شەتەلدىك كولىكتەرگە ديزەل وتىنى 450 تەڭگەدەن ساتىلادى. سونداي-اق قازاقستاندىق تۇتىنۋشىلارعا دا ليميت قويىلدى. ياعني، جەڭىل كولىككە تاۋلىگىنە 100 ليتر ديزەل 230-260 تەڭگەدەن ساتىلادى. ەگەر ودان كوپ الاتىن بولساڭىز، ەكى ەسە باعاعا ساتىپ الۋىڭىزعا تۋرا كەلەدى. ەنەرگەتيكا مينيسترلىگى ارنايى بۇيرىققا قول قويدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
قازاقستاننىڭ ديزەلى ارزان بولعان سوڭ ونى تمد ەلدەرى جۇك كولىك جۇرگىزۋشىلەرى توننالاپ الىپ كەتىپ جاتىر دەگەن قازاقستاندىق تۇتىنۋشىلار جاڭا بۇيرىقتىڭ شىققانى دۇرىس بولدى دەيدى. وسى ۋاقىتقا دەيىن وزگە ەلدىڭ كولىكتەرى باكتارىن تولتىرىپ جاتقاندا، كاسسيرگە جالىنىپ تۇراتىنبىز دەيدى وتاندىق تىزگىنشىلەر.
«جوق دەيدى. ەڭ بولماسا 50 ليتر بەرسەڭىزشى جەتەتىن جەرىمىزگە جەتىپ الايىق دەسەڭ. جوق دەيدى. ساتپايدى. قىرعىز بەن سول جەرگە وزبەكتىڭ كولىگى كەلەتىن بولسا، ولارعا ساتادى»، – دەدى جۇك كولىگىنىڭ جۇرگىزۋشىسى اسىلحان رايىمبەكوۆ.
«ديزەل جوق. جانارماي بەكەتىندە جوق. جوق بوپ جاتىر»، – دەدى جۇك كولىگىنىڭ جۇرگىزۋشىسى ريشات بەرىكبول ءراشات.
«ەنەرگەتيكا مينيسترلىگىنىڭ مۇناي ونىمدەرىنە شەكتى باعالاردى بەلگىلەۋ تۋرالى بۇيرىعىندا بىلاي دەلىنگەن. ەگەر تىزگىنشى قازاقستان ازاماتى بولسا، سونىمەن قاتار ول ءبىزدىڭ ەلدە بەرىلگەن جۇرگىزۋشى كۋالىگىن كورسەتسە، وڭىرىنە قاراي ءبىر ليتر ديزەلدى 230-260 تەڭگەدەن ساتىپ الا الادى. ءبىراق ول كەزدە وتىننىڭ ءليميتى 100 ليتر. ال كولىگى قازاقستاندا تىركەلگەنى تۋرالى كۋالىكتى كورسەتكەن جۇك ماشيناسىنا ليميت تاۋلىگىنە 300 ليتر بولماق ەكەن. ەندى ەڭ قىزىعى، ەگەر بەلگىلەنگەن ليميتتەن جوعارى ديزەل الاتىن بولساڭىز وندا ءليترى 450 تەڭگەدەن ساۋدالانادى. اسىرەسە، شەتەلدەن كەلىپ، توننالاپ ديزەل اكەتەتىن كولىكتەرگە توقتاۋ سالۋ ءۇشىن جاسالعان»، - دەيدى ەنەرگەتيكا مينيسترلىگىنىڭ وكىلى.
«قازاقستان رەسپۋبليكاسىنىڭ ەنەرگەتيكا مينيسترلىگى مۇددەلى تاراپتارمەن بىرلەسىپ، اۆتوجانارماي قۇيۋ ستانسيالارىندا ساتىلاتىن ديزەل وتىنىنىڭ تاۋلىكتىك كولەمىن ودان ارى قاداعالاۋ ءۇشىن اقپاراتتىق جۇيەنى انىقتاۋعا بايلانىستى ماسەلەلەردى پىسىقتاپ جاتىر. جاقىن ارادا اۆتوجانارماي قۇيۋ ستانسيالارى وكىلدەرىمەن بىرلەسىپ، جۇيەلەردى تەستىلەۋ وتكىزىلەتىن بولادى، – دەدى ق ر ەنەرگەتيكا مينيسترلىگى مۇناي تاسىمالداۋ جانە وڭدەۋ دەپارتامەنتىنىڭ باسقارما باسشىسى تالعات ماقۋوۆ.
ايتا كەتسەك، Argus كاسپيي نارىعى سەرۆيسىنىڭ دەرەكتەرىنە سايكەس 1 تامىزداعى جاعداي بويىنشا ەەو مۇشە ەلدەردە ءبىر ليتر ديزەل ارمەنيادا - 758 تەڭگە، رەسەي مەن بەلورسۋلتە - 446 تەڭگە، قىرعىزستاندا - 412 تەڭگە. ەندى اتالعان ەلدەردەن كەلىپ، ءبىزدىڭ ارزان ديزەلدى العىسى كەلەتىندەرگە باعا سول مەملەكەت باعاسىمەن تەڭەستى.