تاياۋ جىلدارى قازاقستان ورتالىق ازيا اۋماعىندا وڭتۇستىك كورەيالىق كولىكتەردىڭ ءوندىرىسى بويىنشا حابقا اينالۋى مۇمكىن.
كورەيلىك كومپانيالار بۇعان زور قىزىعۋشىلىق تانىتىپ وتىر. ءبىزدىڭ ەلدە تەك كولىك قۇراستىرۋ عانا ەمەس، ءتۇرلى جابدىقتاردى ءوندىرۋ دە جوسپاردا بار. سونىڭ العاشقى قادامى رەتىندە، ەلوردادا شاعىن جۇك كولىكتەرىن شىعاراتىن زاۋىت اشىلدى، دەپ حابارلايدى Almaty-akshamy.kz
جوبا قۇنى - 11 ملرد تەڭگە. العاشقى كەزەڭدە 240 ادام جۇمىسپەن قامتىلعان. جىلىنا 12 مىڭعا جۋىق تەحنيكا شىعارا الادى.
«80 پايىزى ەكسپورتقا كەتەدى» دەپ جوسپارلانعان. شارۋا كولىكتەرى 1 تونناعا دەيىن جۇك تاسي الادى. ءقازىردىڭ وزىندە 2 مىڭ كولىككە تاپسىرىس تۇسكەن. زاۋىت كەشەنىنە دانەكەرلەۋ، بوياۋ جانە قۇراستىرۋ بويىنشا وندىرىستىك الاڭدار، سونداي-اق قوندىرمالاردى ءوندىرۋ سەحى بار. الداعى ەكى جىلدا ءوندىرىس ورنى كەڭەيىپ، كاسىپورىندا ەلەكتر جانە سۋتەگىمەن جۇرەتىن كولىكتەر، اۋىر جۇك ماشينالارى، كران جانە گيدروكوتەرگىش سىندى ارنايى تەحنيكالار شىعارۋ جوسپارلانىپ وتىر.
"ءبىز بولاشاقتا قازاقستان جەرىندە ورتالىق ازيا اۋماعى ءۇشىن حاب بولاتىن ءىرى ءوندىرىس ورىندارىن اشۋدى جوسپارلاپ وتىرمىز. وسى جەردە كولىكتىڭ كوپتەگەن تۇرلەرىن شىعارساق دەيمىز. ءبىزدىڭ نەگىزگى ماقساتىمىز ماشينانى كوپ ساتۋ ەمەس، قازاقستانعا جاڭا تەحنولوگيالاردى الىپ كەلۋ"، - دەيدى وڭتۇستىك كورەيالىق كولىك كومپانياسىنىڭ اعا ۆيسە-پرەزيدەنتى يك تە كيم.
"5 جىلدىڭ ىشىندە موتور قۇراستىرۋ، قوزعالتقىش قۇرالدارىن قۇراستىرۋ، ونىڭ ىشىندە جۇك كولىكتەرىنىڭ ديسكىسىن قۇراستىرۋ جانە دە اينەك دەتالدارىن شىعارۋ بويىنشا جوسپارىمىز بار"، - دەيدى كومپانيا ديرەكتورى تەمىر جۇرىن.