ق ر پرەزيدەنتىنىڭ فارماسيەۆتيكا سالاسىنداعى وتاندىق ءوندىرىستىڭ ۇلەسىن 50%-عا جەتكىزۋ جونىندەگى تاپسىرمالارىن ورىنداۋ شەڭبەرىندە قازاقستاندا ءىرى ستراتەگيالىق ينۆەستيسيالىق جوبا جۇزەگە اسىرىلادى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى.
قۇجاتتا ق ر دەنساۋلىق ساقتاۋ مينيسترلىگى مەن «Khan Tengri Biopharma» ج ش س اراسىنداعى «الاتاۋ» ارنايى ەكونوميكالىق ايماعىندا زاماناۋي «بيوفارماسيەۆتيكالىق تولىق سيكلدى كەشەن سالۋ» جونىندەگى ينۆەستيسيالار تۋرالى كەلىسىم جوباسى ماقۇلداندى.
نىسان دارىلىك زاتتار ءوندىرىسىنىڭ وزىق تەحنولوگيالارىمەن جابدىقتالادى دەپ جوسپارلانۋدا. نەگىزگى ماقسات – 58 پرەپارات ءتۇرىن شىعاراتىن ءوندىرىس قۋاتىن قۇرۋ. تولىق سيكلدى ىسكە قوسۋعا، ونىڭ ىشىندە بەلسەندى فارماسيەۆتيكالىق ينگرەديەنتتەر وندىرۋگە ەرەكشە نازار اۋدارىلادى.
كەشەننىڭ وندىرىستىك پورتفەلىنە 27 حالىقارالىق پاتەنتتەلمەگەن اتاۋى بار، سونىڭ ىشىندە ونكولوگيالىق، اۋتويممۋندى، سيرەك جانە قابىنۋ اۋرۋلارىن ەمدەۋگە ارنالعان پرەپاراتتار كىرەدى.
ينۆەستيسيالاردىڭ جالپى كولەمى 103 ملرد تەڭگەدەن اسادى. كەشەندە 180-نەن استام جاڭا تۇراقتى جۇمىس ورنى اشىلادى.
جوبانى جۇزەگە اسىرۋ ەلىمىزدىڭ فارماسيەۆتيكا سالاسىن دامىتۋدا ستراتەگيالىق ماڭىزعا يە جانە لوكاليزاسيانى كەڭەيتۋگە، ورنىقتى وندىرىستىك بازانى قالىپتاستىرۋعا، سونداي-اق الەۋمەتتىك ماڭىزى بار پرەپاراتتاردىڭ يمپورتىن كەزەڭ-كەزەڭىمەن الماستىرۋعا باعىتتالعان. ودان بولەك، شىعارىلاتىن ءونىمنىڭ ءبىر بولىگىن ەاەو، تمد ەلدەرىنىڭ، سونداي-اق تاياۋ شىعىس مەملەكەتتەرىنىڭ نارىقتارىنا ەكسپورتتاۋ جوسپارلانىپ وتىر.