ەلىمىزدە قانت ءوندىرۋ مەن ساتۋدىڭ جاڭا سحەمالارى جاسالادى

جاعداي تۇراقتاندى 

بۇگىن پرەمەر-مينيستردىڭ ورىنباسارى – ساۋدا جانە ينتەگراسيا ءمينيسترى سەرىك جۇمانعارين وتاندىق قانت زاۋىتتارى، سالا قاۋىمداستىقتارى، ساۋدا بيرجالارى وكىلدەرىمەن، ترەيدەرلەرمەن جانە كونسۋلتانتتارمەن قانت جانە باسقا دا ازىق-تۇلىكتىڭ باعاسىن تۇراقتاندىرۋ، ونىڭ ءوسۋ قارقىنى بويىنشا بىرلەسكەن شەشىمدەردى تالقىلاۋ جانە ازىرلەۋ ءۇشىن كەزدەستى، دەپ حابارلايدى Almaty-akshamy.kz.
ۇكىمەت رەسمي سايتىنىڭ جازۋىنشا، تالقىلانعان باستى تاقىرىپ – باعا تۇراقتاندىرۋ جانە ەلدە قانت تاپشىلىعىنا جول بەرمەۋ.
كەزدەسۋدە قازاقستاندىق قانت، تاماق جانە قايتا وڭدەۋ ونەركاسىبى قاۋىمداستىعىنىڭ پرەزيدەنتى ايجان ناۋرىزعالييەۆا اتاپ وتكەندەي، نەگىزگى ەكسپورتتاۋشى ەلدەردىڭ قانت ەكسپورتىنا قابىلداعان شەكتەۋ شارالارى ىشكى نارىقتا دۇرلىگۋگە الىپ كەلدى، ءبىراق بۇگىنگى تاڭدا جاعداي تۇراقتاندى.
«ءبىز بىرلەسىپ، زاۋىتتاردى شيكىزاتپەن، ال ەلدى وسى ونىممەن تۇراقتى باعادا قامتاماسىز ەتۋ ءۇشىن قانتتى قارجىلاندىرۋ، قايتا وڭدەۋدى ۇيىمداستىرۋ جانە ساتۋ سحەمالارىن قايتا قاراپ، ازىرلەيمىز. مەن مۇنى الداعى كۇندەرى جاساۋدى ۇسىنامىن»، — دەدى سەرىك جۇمانعارين.
قانت سالاسى بويىنشا كەڭەسكە قاتىسۋشىلار بۇل ۇسىنىستى قولدادى.
سونداي-اق بۇل كۇنى سەرىك جۇمانعارين نەگىزگى تاماق ونىمدەرى ءوندىرىسىنىڭ باسقا سالالارىنىڭ پروبلەمالارى مەن دامۋ مۇمكىندىكتەرىن تالقىلاۋ ءۇشىن ەت وداعىنىڭ، باعباندار وداعىنىڭ، استىق وڭدەۋشىلەر وداقتارىنىڭ، ورگانيكالىق ءونىم وندىرۋشىلەردىڭ جانە باسقا دا اگرارلىق ساراپشىلاردىڭ وكىلدەرىمەن كەزدەسۋلەر وتكىزدى.
قاتىسۋشىلار تاراپىنان كوپتەگەن ۇسىنىستار ايتىلدى، ءوندىرىستىڭ ءاربىر باعىتىن پىسىقتاۋ ءۇشىن قوسىمشا كەزدەسۋلەر وتكىزۋ جونىندە شەشىم قابىلداندى.