ەلىمىزدە قانشا شەتەلدىك ستۋدەنت تەگىن وقيدى؟

بيىل باعدارلاماعا قاتىسۋعا 6 024 ءوتىنىم كەلىپ ءتۇستى.

قازاقستاندىق ۋنيۆەرسيتەتتەردە تەگىن وقىعىسى كەلەتىن 2 149 ادام الەمنىڭ 80 ەلىنەن كونكۋرسقا قاتىسقان، دەپ حابارلايدى Almaty-akshamy.kz

«وسىمەن ءتورتىنشى جىل قاتارىنان ەلىمىزدە شەتەلدىك ازاماتتارعا، ونىڭ ىشىندە قازاقستان ازاماتى بولىپ سانالمايتىن ۇلتى قازاق تۇلعالارعا ارنالعان ستيپەنديالىق باعدارلاماعا ۇمىتكەرلەردى ىرىكتەۋ جۇرگىزىلۋدە. اتالعان باعدارلاماعا قاتىسۋعا نيەت بىلدىرۋشىلەر سانى جىل سايىن ارتىپ كەلەدى. بيىل باعدارلاماعا قاتىسۋعا 6 024 ءوتىنىم كەلىپ ءتۇستى. ۇمىتكەرلەر باعدارلاما تالاپتارىنا سايكەس قاتاڭ ىرىكتەۋدەن ءوتتى. ءوتىنىم بىلدىرۋشىلەر جوعارى اكادەميالىق ۇلگەرىم، تالاپ ەتىلگەن قۇجاتتاردىڭ بار بولۋى جانە ىرىكتەۋدىڭ بارلىق كەزەڭدەرىنەن ءساتتى ءوتۋى نەگىزىندە ىرىكتەلدى. قازىرگى كۇندە ۇمىتكەرلەردىڭ ناتيجەلەرىن تالداۋ جۇمىستارى جۇرگىزىلۋدە»، - دەپ عىلىم جانە جوعارى ءبىلىم ءمينيسترى ساياسات نۇربەك ءوزىنىڭ Facebook پاراقشاسىندا جازدى.

ەسكە سالا كەتەيىك، بيىل ستيپەنديالىق باعدارلاماعا قاتىسۋعا ءوتىنىم بەرۋ 30 ناۋرىز بەن 30 ماۋسىم ارالىعىندا جۇرگىزىلدى. 2023 جىلى اتالعان باعدارلاما بويىنشا 550 گرانت ءبولىندى. اتاپ ايتقاندا، باكالاۆريات باعدارلامالارىنا 490 گرانت، ماگيستراتۋراعا 50 جانە دوكتورانتۋراعا 10 گرانت بولىنگەن.

سوڭعى شەشىم وسى جىلدىڭ تامىز ايىنىڭ سوڭعى ون كۇنىندە عىلىم جانە جوعارى ءبىلىم مينيسترلىگى جانىنداعى ستيپەندياتتاردى ىرىكتەۋ جونىندەگى كونكۋرستىق كوميسسيانىڭ شەشىمىمەن قابىلدانادى.

ايتا كەتەرلىگى، ستيپەنديالىق باعدارلاما ىسكە قوسىلعاننان بەرى وعان قاتىسۋعا 10 مىڭنان استام ۇمىتكەر ءوتىنىم بەرگەن. باعدارلاما بويىنشا 139 ستيپەنديات وتاندىق جوعارى وقۋ ورنىن ءتامامدادى. بۇگىندە 538 ستۋدەنت اتالعان باعدارلاما شەڭبەرىندە ءبىلىم الىپ جاتىر.