ناۋرىز ايىنىڭ قورىتىندىسى بويىنشا، تەمىرجول تاسىمالى قىزمەتىنىڭ باعاسى ءبىر جىلدا 1،6%-عا وسكەن.
Ranking.kz دەرەكتەرىنە سايكەس، بءىر جىلدىڭ ىشىندە ەلوردادا پويىز بيلەتتەرى 9،8%-عا قىمباتتاعان. ال جامبىل، ماڭعىستاۋ، سولتۇستىك قازاقستان جانە تۇركىستان وبلىستارىندا بيلەت باعاسى بىلتىرعى جىلدىكىن ساقتاپ تۇر. كەرىسىنشە، شىمكەنت پەن قىزىلوردا وبلىستارىندا باعا 1،5% جانە 2% تومەندەگەن، دەپ حابارلايدى Almaty-akshamy.kz.
سونىمەن قاتار تەمىرجول تاسىمالى سالاسىنداعى كومپانيالاردىڭ كىرىسى 20،8%-عا وسكەن. بۇل دەگەنىمىز – 196،2 ملرد تەڭگە. ونىڭ 185،2 ملرد تەڭگەسى جۇك پەن باگاج تاسىمالىنان، ال 11 ملرد تەڭگەسى جولاۋشىلار تاسىمالىنان تۇسكەن.
جىل باسىنان اقپانعا دەيىنگى ارالىقتا تەمىرجول ارقىلى 2،5 ملن ادام تاسىمالدانعان. بىلتىرعى جىلمەن سالىستىرعاندا، 28،8%-عا ارتىق كورسەتكىش.