دەنساۋلىق ساقتاۋ ءمينيسترى اجار عينيات پفايزەر كومپانياسىنىڭ وكىلدەرىمەن كەزدەستى.
كەزدەسۋدە ەلىمىزدە ۆاكسينالار ءوندىرۋ سالاسىنداعى جوبالاردى بىرلەسىپ ىسكە اسىرۋ ماسەلەلەرى تالقىلاندى، دەپ حابارلايدى Almaty-akshamy.kz.
پفايزەر كومپانياسىنىڭ وڭىرلىك ديرەكتورى وزگۋر يازيۋرتپەن تىلدەسۋ بارىسىندا ۆەدومستۆو باسشىسى فارماسيەۆتيكا ونەركاسىبىن دامىتۋعا ءارى ارىپتەستىك قاتىناستاردى تەرەڭدەتۋگە باعىتتالعان باستاماسى ءۇشىن ريزاشىلىعىن ءبىلدىردى.
"ءبىز امەريكاندىق تەحنولوگيالاردىڭ ترانسفەرتىن، ونىڭ ىشىندە ق ر دەنساۋلىق ساقتاۋ جۇيەسىن دامىتۋعا بەلسەندى ۇلەس قوسا وتىرىپ، اۋرۋلاردى دياگنوستيكالاۋ مەن ەمدەۋدىڭ زاماناۋي ادىستەرىن ەنگىزۋگە باعىتتالعان جوبالاردى بىرلەسىپ ىسكە اسىرۋدى قولدايمىز. ءبىزدىڭ ىنتىماقتاستىعىمىزدىڭ كەلەسى ماڭىزدى كەزەڭى قازاقستاندا Pfizer كومپانياسىنىڭ پريەۆەنار 20 ۆاكسيناسىنىڭ جاڭا بۋىنىن ءوندىرۋدى ورنىقتىرۋ بولادى"، - دەپ اتاپ ءوتتى ا.عينيات.
بۇدان ءارى كەزدەسۋ بارىسىندا نورماتيۆتىك بازانى جەتىلدىرۋ جانە قازاقستاندا فارماسيەۆتيكا ءوندىرىسىن ورنىقتىرۋ جونىندەگى جوبالاردى ىسكە اسىرۋ ءۇشىن قولايلى ينۆەستيسيالىق احۋال قۇرۋ ماسەلەلەرى كوتەرىلدى.