ەلىمىزدە پارلامەنت سەناتىنىڭ دەپۋتاتتارىن سايلاۋ باستالدى

سەنات دەپۋتاتتارىن سايلاۋ بيۋللەتەنىنە 55 كانديدات تىركەلگەن.

ەلىمىزدە بۇگىن ساعات 10.00-دە ق ر پارلامەنتى سەناتىنىڭ دەپۋتاتتارىن سايلاۋ باستالدى، دەپ حابارلايدى اlmaty-akshamy.kz قازاقپاراتقا سىلتەمە جاساپ.

ورتالىق سايلاۋ كوميسسياسىنىڭ مالىمەتىنە سايكەس، سەنات دەپۋتاتتارىن سايلاۋ بيۋللەتەنىنە 55 كانديدات تىركەلگەن. ونىڭ ىشىندە، الماتىدان - 4، جامبىل، پاۆلودار، الماتى، جەتىسۋ، سقو جانە تۇركىستان وبلىستارىنان - 2 كانديدات بار. باسقا وڭىرلەردەن جانە استانا مەن شىمكەنتتە 3 كانديداتتان تىركەلگەن.

رەسپۋبليكا بويىنشا سەنات دەپۋتاتتارىن سايلاۋعا 3 168 داۋىس بەرۋشى قاتىسادى. ەڭ كوپ داۋىس بەرۋشى تۇركىستان (317 داۋىس بەرۋشى) جانە قوستاناي (263 داۋىس بەرۋشى) وبلىستارىندا. ال ەڭ ازى استانادا – 31، شىمكەنتتە – 30 جانە الماتىدا – 38.

سەنات دەپۋتاتتىعىنا كانديداتتاردىڭ تولىق تىزىمىمەن مىنا سىلتەمە بويىنشا ءوتىپ، تانىسۋعا بولادى.

ەلىمىزدىڭ ورتالىق سايلاۋ كوميسسياسىنىڭ قازاقستان رەسپۋبليكاسى پارلامەنتى سەناتى دەپۋتاتتارىنىڭ كەزەكتى سايلاۋىن ازىرلەۋ مەن وتكىزۋ جونىندەگى نەگىزگى ءىس-شارالاردىڭ كۇنتىزبەلىك جوسپارىنا سايكەس، وتكەن جىلى 24 جەلتوقساندا جەرگىلىكتى ۋاقىتپەن ساعات 18:00-دە كانديداتتاردى تىركەۋ اياقتالدى.

ال 13 قاڭتار كۇنى ساعات 00:00-دە كانديداتتاردىڭ سايلاۋالدى ۇگىت-ناسيحات جۇمىستارى توقتاتىلدى. وسىلايشا، كۇنتىزبەلىك جوسپارعا سايكەس، داۋىس بەرۋ كۇنىن ۇيىمداستىرۋ مەن وتكىزۋگە بايلانىستى سايلاۋ الدىنداعى بارلىق ءىس-شارالار اياقتالدى.

ايتا كەتەيىك، سەنات دەپۋتاتتارىن سايلاۋ كۇنى، ياعني بۇگىن ق ر ورتالىق سايلاۋ كوميسسياسىنىڭ ينتەرنەت-رەسۋرسى ارقىلى سايلاۋشىلاردى تىركەۋدى جانە داۋىس بەرۋدىڭ الدىن الا قورىتىندىلارىن شىعارۋدى ونلاين-بايقاۋ سەرۆيستەرى جۇمىس ىستەيدى. بۇل سايلاۋ پروسەسىنىڭ اشىقتىعى مەن جاريالىلىعىنا ىقپال ەتەدى.