وتكەن جىلى قازاقستاندا 66 مىڭ گەكتار القاپقا 138 ملن ءتۇپ اعاش وتىرعىزىلدى.
بۇل تۋرالى ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ ايتتى.
ءمينيستردىڭ ايتۋىنشا، بيوالۋانتۇرلىلىكتى ساقتاۋ ماقساتىندا «جاسىل قازاقستان» ۇلتتىق جوباسىنا 3 كورسەتكىش پەن 8 ءىس-شارا قابىلدانعان. ۇلىتاۋ تاۋ-دالا ءماسسيۆىنىڭ ەكوجۇيەسىن قالپىنا كەلتىرىپ، ساقتاۋ ءۇشىن مەملەكەت باسشىسىنىڭ تاپسىرماسىمەن اۋدانى 58،9 مىڭ گەكتار «ۇلىتاۋ» ۇلتتىق پاركى قۇرىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مەملەكەت باسشىسىنىڭ 2 ميلليارد اعاش وتىرعىزۋ تاپسىرماسىمەن وبلىس اكىمدىكتەرى ورماندى قالپىنا كەلتىرۋ جونىندەگى كەشەندى جوسپارلارىن بەكىتتى، ينتەراكتيۆتى كارتا دايىندالىپ، كەرەكتى تەحنيكا مەن جابدىق قۇرالدارى ساتىپ الىندى. وتكەن جىلى جوسپارلانعان 44،3 مىڭ گا ورنىنا 66 مىڭ گەكتار القاپقا 138 ملن اعاش وتىرعىزىلدى. بيىل كوكتەمدىك وتىرعىزىلىمدا جوسپارلانعان 66،9 مىڭ گەكتاردىڭ 39 مىڭ گەكتارىنا 106،4 ملن اعاش وتىرعىزىلدى. ورمان داقىلدارىنىڭ نەگىزگى جۇمىس كولەمىن اياقتاۋ كۇز مەزگىلىنە جوسپارلانعان»، - دەدى س. برەكەشيەۆ ۇكىمەتتىڭ بۇگىنگى وتىرىسىندا.
سونىمەن بىرگە ارال ءوڭىرىنىڭ ەكولوگيالىق جاعدايىن جاقسارتۋ ماقساتىندا وتكەن جىلى 100 مىڭ گا سەكسەۋىل وتىرعىزىلعان جانە بيىل 250 مىڭ گەكتار وتىرعىزۋ جوسپارلانعان. وسى جىلدىڭ كوكتەمىندە 12 مىڭ گەكتار سەكسەۋىل ەگىلسە، قالعان 238 مىڭ گەكتار القاپقا كۇزدە ەگىلەدى.
«بىلتىر رەسپۋبليكا بويىنشا ورمان داقىلدارىنىڭ جەرسىنۋىنە ينۆەنتاريزاسيا جۇرگىزىلدى. كۇزگى ينۆەنتاريزاسيا بويىنشا ورمان داقىلدارىنىڭ جەرسىنۋى شامامەن 72% كورسەتكەن. بيىل اقتوبە جانە باتىس قازاقستان وبلىستارىندا بەكىتىلگەن جوسپارلى جۇمىستاردى جۇرگىزۋگە قارجى بولىنبەدى، بۇل مەملەكەت باسشىسىنىڭ تاپسىرماسىن ورىنداۋعا كەدەرگى كەلتىرۋى مۇمكىن. وسىعان بايلانىستى، ورمان يەلەرىن ماتەريالدىق-تەحنيكالىق قۇرالمەن قامتۋ، ورماندى قالپىنا كەلتىرۋ ماسەلەلەرىن شەشۋ ماقساتىندا اتالعان وبلىس اكىمدەرىنەن جەرگىلىكتى بيۋدجەتتەن قاراجات ءبولۋ مۇمكىندىگىن قاراستىرۋدى سۇرايمىن»، - دەدى ەكولوگيا ءمينيسترى.