ەلىمىزدە وقۋ ۇلگەرىمى تومەن 500 مىڭعا جۋىق بالا بار.
بۇل تۋرالى پەداگوگتەردىڭ رەسپۋبليكالىق تامىز كونفەرەنسياسىندا وقۋ-اعارتۋ ءمينيسترى اسحات ايماعامبەتوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ەلىمىزدە «سيفرلىق پەداگوگ» جوباسى باستالادى. قازىرگى كەزدە وقۋ ۇلگەرىمى تومەن 500 مىڭعا جۋىق بالا بار. وسى بالالاردى اتالعان جوبامەن قامتيتىن بولامىز. وقۋ ۇلگەرىمى تومەن بالالار ءۇشىن ءار جۇما سايىن بىرنەشە ءپان بويىنشا قوسىمشا ساباقتار بەرىلەدى»، - دەدى ا. ايماعامبەتوۆ.
وسى ورايدا ول بۇل بالالارعا پسيحولوگتار دا كومەكتەسەتىنىن ايتتى.
«بۇل جوبانى جاڭا وقۋ جىلىنان باستاپ ەلىمىزدىڭ بارلىق وڭىرىندە ەنگىزەمىز»، - دەدى ۆەدومستۆو باسشىسى.
بۇدان بۇرىن حابارلانعانداي، وقۋ-اعارتۋ ءمينيسترى اسحات ايماعامبەتوۆ بالاباقشالاردا پەداگوگتەردىڭ جۇكتەمەسىن ازايتۋ جوسپارى تۋرالى ايتتى.