ساراپشىلاردىڭ بولجامى بويىنشا، الداعى 5 جىلدا قىزمەتكەرلەردىڭ داعدىلارى مەن تالاپتاردىڭ 40%-عا جۋىعى وزگەرەدى.
جاستاردىڭ 34،1%-ى ماماندىقتى ءوز بەتىنشە تاڭدايدى. ساراپشىلاردىڭ بولجامى بويىنشا، الداعى 5 جىلدا قىزمەتكەرلەردىڭ داعدىلارى مەن تالاپتاردىڭ 40%-عا جۋىعى وزگەرەدى. بۇل تۋرالى ەڭبەك جانە حالىقتى الەۋمەتتىك قورعاۋ ۆيسە-مينيسترى ەرجان ءبىرجانوۆ ايتتى، دەپ حابارلايدى Almaty-akshamy.kz
ۆيسە-مينيستردىڭ ايتۋىنشا، ەڭبەك نارىعىنا تالداۋ جۇرگىزىلگەن. سوعان سايكەس، نازار اۋدارۋدى تالاپ ەتەتىن نەگىزگى اسپەكتىلەر ايقىندالعان.
«اتاپ ايتقاندا، جۇمىسپەن قامتىلعانداردىڭ 15،2%-ىنىڭ تەك ورتا ءبىلىمى بار، تۇلەكتەردىڭ 40%-دان استامى ماماندىق بويىنشا جۇمىس ىستەمەيدى، جاستاردىڭ 34،1%-ى ماماندىقتى ءوز بەتىنشە تاڭدايدى»، – دەدى ۆيسە-مينيستر.
وسى ماسەلەلەردى شەشۋ ءۇشىن:
- بيزنەسپەن بىرلەسىپ، كاسىپورىندار جانىنداعى وقۋ ورتالىقتارى بازاسىندا جاپپاي قايتا دايارلاۋدىڭ، بىلىكتىلىكتى ارتتىرۋدىڭ «فابريكالارىن» قۇرۋ قاجەت. جاستاردى سۇرانىسقا يە ماماندىقتارعا وقىتۋعا ەرەكشە نازار اۋدارۋ جوسپارلانۋدا؛
- سۇرانىسقا يە داعدىلاردى تانۋ جۇيەسىن ەنگىزۋ. مەملەكەت باسشىسىنىڭ تاپسىرماسى بويىنشا ەڭبەكمينى «كاسىپتىك بىلىكتىلىك تۋرالى» زاڭ جوباسىن ازىرلەدى. ونىڭ شەڭبەرىندە بىلىكتىلىكتى تانۋدىڭ تاۋەلسىز ورتالىقتارىن قۇرۋ ءۇشىن ءتيىمدى جاعدايلار جاساۋ، جىل سايىنعى سەرتيفيكاتتاۋدان ءوتۋ ءۇشىن ىزدەنۋشىلەرگە كەمىندە 1000 ۆاۋچەر ۇسىنۋ كوزدەلەدى. ياعني، ءبىر رەتتىك ۆاۋچەر نەگىزىندە جۇمىسسىزدار كەيىننەن جۇمىسقا ورنالاسۋ ءۇشىن ءوز بىلىكتىلىگىن راستاي الادى؛
- skills.enbek.kz پلاتفورماسى ارقىلى جاڭا ءبىلىم مەن داعدىلاردى يگەرۋ ءۇشىن جاعداي جاساۋ. پورتال 2021 جىلى جالپى ەل حالقىنىڭ ءبىلىم دەڭگەيى مەن كاسىبيلىگىن ارتتىرۋ، مانساپتىق دامۋدى ىنتالاندىرۋ جانە «ءومىر بويى وقىتۋ» تۇجىرىمداماسىن ىلگەرىلەتۋ ماقساتىندا ىسكە قوسىلدى. بۇل - Coursera سياقتى حالىقارالىق ونلاين وقىتۋ پلاتفورمالارىنىڭ انالوگى؛
- وقۋشىلار مەن جاستار اراسىندا كاسىپتىك باعدارلاۋدى ۇيىمداستىرۋ ءۇشىن مانساپتىق ىلگەرىلەۋ بويىنشا كەمىندە 100 نۇسقاۋلىق ازىرلەۋ. سۇرانىسقا يە كاسىپتەر مەن پەرسپەكتيۆالى داعدىلاردىڭ ءتىزىمى جىل سايىن جاڭارتىلىپ وتىرادى.
سونىمەن قاتار، وڭىرلەردە جۇمىسپەن قامتۋ كارتالارى قالىپتاستىرىلماق. وسىلايشا، 2025 جىلعا دەيىن 2 ملن-نان استام، ونىڭ ىشىندە 600 مىڭنان استام تۇراقتى جانە 1،4 ملن-نان استام ۋاقىتشا جۇمىس ورىندارىن قۇرۋ جوسپارلانعان.
«بارلىق قۇرىلعان جۇمىس ورىندارى "جۇمىس ورىندارىن قۇرۋدىڭ ينتەگراسيالانعان كارتاسى" اقپاراتتىق جۇيەسىندە ۆيزۋالداناتىن بولادى. جەرگىلىكتى اتقارۋشى ورگانداردىڭ الدىنا جۇيەنى ساپالى تولتىرۋ مىندەتى قويىلدى. ەكى ايدىڭ قورىتىندىسى بويىنشا، شامامەن 65 مىڭ جۇمىس ورنى نەمەسە جىلدىق جوسپاردىڭ 15% (444،4 مىڭ) قۇرىلدى، ونىڭ ىشىندە 16 مىڭنان استامى تۇراقتى»، – دەپ حابارلادى ەرجان ءبىرجانوۆ.
ۆيسە-مينيستر سونداي-اق بيىلدان باستاپ مەملەكەتتىك جوسپارلاۋدىڭ جاڭا جۇيەسىنە سايكەس ەكونوميكانىڭ باسىم سالالارى بويىنشا ۇلتتىق جوبالاردى ىسكە اسىرۋ باستالعانىن، ولاردىڭ نەگىزگى مىندەتى جۇمىس ورىندارىن قۇرۋ بولىپ تابىلاتىنىن اتاپ ءوتتى. ءوز ءسوزىنىڭ سوڭىندا سپيكەر ەڭبەك مينيسترلىگى جاڭا ترەندتەرگە سايكەس حالىقتى جۇمىسپەن قامتۋ سالاسىن سيفرلاندىرۋ بويىنشا جۇيەلى جۇمىس جۇرگىزىپ جاتقانىن اتاپ ءوتتى.
«نەگىزگى ماقسات – بيزنەس-ۇدەرىستەردى تولىعىمەن قايتا قاراۋ، پرواكتيۆتى فورماتقا كوشۋدى جۇزەگە اسىرۋ. ول ءۇشىن ءبىز ءبىرىڭعاي سيفرلىق ەكوجۇيەنى قۇراتىن بولامىز، وعان مىناداي سەرۆيستەر كىرەدى: ەلەكتروندىق ەڭبەك بيرجاسى – enbek.kz، قىسقا مەرزىمدى ونلاين كۋرستار پورتالى – skills.enbek.kz، فريلانسەرلەر ءۇشىن جۇمىس ىزدەۋ قىزمەتى – freelance.enbek.kz، ەڭبەك شارتتارىن ەسەپكە الۋدىڭ ەلەكتروندىق جۇيەسى – ehr24.kz، كاسىپكەرلىكتى دامىتۋ شارالارىن كورسەتۋ جونىندەگى اۆتوماتتاندىرىلعان جۇيە – business.enbek.kz. بۇل سەرۆيستەردى ەڭبەكمينى «ەڭبەك رەسۋرستارىن دامىتۋ ورتالىعى» اق ماماندارىمەن بىرلەسىپ دەربەس ازىرلەيدى»، – دەپ قورىتىندىلادى ەرجان ءبىرجانوۆ.