وعان قازاقستاندىق 23 ءىرى جۇمىس بەرۋشى قاتىسىپ، 50-دەن استام ماماندىق بويىنشا 1320 بوس جۇمىس ورنىن ۇسىندى.
ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا 27-29 ماۋسىم ارالىعىندا وتەتىن ەلەكتروندىق ەڭبەك بيرجاسىنداعى العاشقى ونلاين ەڭبەك جارمەڭكەسىن اشتى، دەپ حابارلايدى Almaty-akshamy.kz
مينيستر ءوزىنىڭ قۇتتىقتاۋ سوزىندە ەڭبەك جارمەڭكەسى جاس ماماندارعا وتاندىق ەكونوميكانىڭ فلاگمانى سانالاتىن كاسىپورىندارعا جۇمىسقا ورنالاسۋعا بىرەگەي مۇمكىندىك بەرەتىنىن اتاپ ءوتتى.
«ەلەكتروندىق ەڭبەك بيرجاسىنىڭ ارقاسىندا قازاقستاننىڭ تۇكپىر-تۇكپىرىنەن كەلگەن 1 مىڭنان استام جاستىڭ ەلىمىزدىڭ ءىرى كاسىپورىندارى ۇسىنعان 50-دەن استام كاسىپتى قامتيتىن 1320 بوس ورىنعا جۇمىسقا ورنالاسۋ مۇمكىندىگى بار. وسى ەڭبەك جارمەڭكەسىن قولداعان بارلىق كومپانيالارعا العىسىمدى بىلدىرەمىن. وسىنداي ءىس-شاراعا العاش رەت قاتىسىپ وتىرعان جاستارعا: اسىقپاڭىز، قورىقپاڭىز، بۇگىن ءسىزدىڭ كۇنىڭىز»، – دەدى تامارا دۇيسەنوۆا.
27 ماۋسىم كۇنى ەڭبەك جولىن ەندى باستاعالى وتىرعان جاس ماماندارعا ارنالعان ەڭبەك جارمەڭكەسى اياسىندا «ءتيىمدى جۇمىس ىزدەۋ» تاقىرىبىندا ماستەر-كلاسس ۇيىمداستىرىلادى، وندا قاتىسۋشىلارعا ماماندار تۇيىندەمەنى قالاي جازۋ كەرەكتىگىن، جۇمىس بەرۋشىلەرمەن كەزدەسۋدە ءوزىن قالاي ۇستاۋ، قانداي ساتتەرگە نازار اۋدارۋ قاجەت ەكەنىن ۇيرەتەدى.
27-29 ماۋسىم ارالىعىندا ءار جۇمىس بەرۋشى ءوز كومپانياسىن تانىستىرادى. وندا جۇمىس شارتتارى، اشىق بوس جۇمىس ورىندارى، جۇمىسقا ورنالاسۋ ەرەكشەلىكتەرى جانە ت.ب. تۋرالى ايتىلادى. ءبىرقاتار جۇمىس ىزدەۋشىمەن تىكەلەي ەفيردە ونلاين-اڭگىمەلەسۋ وتكىزىلەدى.
ونلاين ەڭبەك جارمەڭكەسى اياسىندا بوس جۇمىس ورنىن ۇسىنعان جۇمىس بەرۋشىلەردىڭ اراسىندا ەۋرازيالىق توپقا (ERG) جانە رەسپۋبليكالىق تاۋ-كەن ءوندىرۋ جانە تاۋ-كەن مەتاللۋرگيا كاسىپورىندارى قاۋىمداستىعىنا كىرەتىن كاسىپورىنداردى، Kaspi.kz، «قازاقستان حالىق بانكى» اق، «كاتكو» بك ج ش س، «Ernst & Young Kazakhstan» ج ش س، «ەۆرازيا گرۋپپ كازاحستان» ج ش س، «Magnum Cash & Carry» ج ش س، «پەرۆوە كرەديتنوە بيۋرو» ج ش س كومپانيالارىن جانە تاعى باسقالارىن اتاپ وتۋگە بولادى.
الداعى ۋاقىتتا وسىنداي جارمەڭكەلەر حالىقتىڭ ءتۇرلى توپتارى ءۇشىن اي سايىن ۇيىمداستىرىلادى.