بۇل تۋرالى ق ر ۇكىمەتىنىڭ وتىرىسى بارىسىندا بەلگىلى بولدى.
اۋىل شارۋاشىلىعى ءمينيسترى ايداربەك ساپاروۆتىڭ ايتۋىنشا، بيىل اۋىل شارۋاشىلىعى داقىلدارى جينالاتىن القاپ 24 ملن گەكتاردى قۇرادى، بۇل 2022 جىلمەن سالىستىرعاندا 652 مىڭ گەكتارعا ارتىق. بۇگىنگى تاڭدا ەلىمىزدىڭ بارلىق وڭىرلەرىندە استىق جيناۋ ناۋقانى اياقتالۋدا. وبلىس اكىمدىكتەرىنىڭ دەرەكتەرى بويىنشا 16،9 ملن گا (98،7%) جينالدى. ورتاشا ونىمدىلىگى 9،7 س/گا باستاپقى سالماقتا 16،4 ملن توننا استىق، ونىڭ ىشىندە 11،4 ملن توننا بيداي باستىرىلدى، دەپ حابارلايدى Almaty-akshamy.kz.
جالپى، اۋا رايىنىڭ قولايسىزدىعىنا قاراماستان، كۇتىلەتىن جالپى استىق ءتۇسىمى 16 ملن توننانى قۇرايدى. بۇل 3 ملن توننا كولەمىندەگى اۋىسپالى قالدىقتاردى ەسكەرە وتىرىپ، ەلدى نانمەن جانە ۇنمەن تولىق قامتاماسىز ەتۋگە جەتكىلىكتى.
سونىمەن قاتار ەلىمىزدە 4،3 ملن توننا كوكونىس داقىلدارى، 3،5 ملن توننا كارتوپ جانە 1،6 ملن توننا مايلى داقىلدار جينالدى، اتاپ ايتقاندا 747،5 مىڭ توننا كۇنباعىس باستىرىلدى.
مينيستر ەگىن جيناۋ جۇمىستارىن ۋاقتىلى جۇرگىزۋ ءۇشىن اۋىل شارۋاشىلىعى ۇيىمدارىنا ليترىنە 250 تەڭگەدەن 426 مىڭ توننا جەڭىلدەتىلگەن ديزەل وتىنى بولىنگەنىن ايتتى. سونىمەن قاتار اعىمداعى جاعدايدى ەسكەرە وتىرىپ، ءداندى جانە مايلى داقىلداردى كەپتىرۋ ءۇشىن قوسىمشا 62،5 مىڭ توننا جەڭىلدەتىلگەن ديزەل وتىنىن ءبولۋ تۋرالى شەشىم قابىلدانعان.
سونداي-اق قوستاناي وبلىسىنىڭ اكىمى قۇمار اقساقالوۆ، اقمولا وبلىسىنىڭ اكىمى مارات احمەتجانوۆ، سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆ پەن قاراعاندى وبلىسى اكىمىنىڭ ورىنباسارى باۋىرجان اسانوۆ ەگىن وراعى ناۋقانىن وتكىزۋ ناتيجەلەرىنە توقتالدى.
پرەمەر-مينيستر بيىل ەلىمىزدىڭ ەگىنشىلەرى ءۇشىن وتە قيىن جىل بولعانىن اتاپ ءوتتى. جازدىڭ اپتاپ ىستىعى مەن قۇرعاقشىلىقتان القاپتاعى ەگىن قاتتى زارداپ شەكتى. ودان كەيىن تامىزدان باستاپ وسى كۇنگە دەيىن ۇزدىكسىز جاۋعان جاۋىن-شاشىن استىقتىڭ ساپاسى مەن ءتۇسىمىن تومەندەتىپ جىبەردى.
«قولايسىز اۋا-رايى ديقانعا دا، تەحنيكاعا دا قولبايلاۋ بولدى. ەگىن وراعى ۇزاققا سوزىلىپ كەتتى. ەليەۆاتورلارعا تۇسكەن بيدايدىڭ 40%-عا جۋىعى ەشقانداي كلاسقا جاتپايدى. الايدا، قازاقستاندىقتار بيىل ناننان تارىقپايدى. وتكەن جىلدان قالعان قوردى ەسكەرەتىن بولساق، جينالعان ءونىم كولەمى ىشكى نارىقتى تولىقتاي قامتاماسىز ەتۋگە جەتكىلىكتى»، — دەدى ءاليحان سمايىلوۆ.
ول وتاندىق فەرمەرلەرگە مەملەكەت تاراپىنان قاجەتتى قولداۋ شارالارى كورسەتىلگەنىن ەسكە سالدى. اتاپ ايتقاندا، ءادىل ساتىپ الۋ باعاسى بەلگىلەندى. ايىپپۇل سانكسيالارىن قولدانباي، نەسيەلەر مەن قارىزداردى قايتارۋ مەرزىمدەرى ۇزارتىلدى. جەڭىلدەتىلگەن ديزەل وتىنى، ونىڭ ىشىندە استىقتى كەپتىرۋ ءۇشىن قاجەتتى وتىن كولەمى ءبولىندى.
سونىمەن قاتار سۋبسيديالاردى تولەۋ بويىنشا مىندەتتەمەلەردى تولىق كولەمدە ورىنداۋ ءۇشىن شارالار قابىلدانىپ جاتىر. وسىلايشا، وسىمدىك شارۋاشىلىعى بويىنشا العاشقى 30 ملرد تەڭگە سۋبسيديالارى ءبولىندى.
سونىمەن قاتار بيدايدى تىكەلەي ساتىپ الۋ ءۇشىن ءتيىستى قارجى ءبولۋ تۋرالى شەشىم قابىلداندى.
«تاعى دا اتاپ وتكىم كەلەدى. ىشكى نارىقتا بيدايمەن پروبلەما بولماۋى كەرەك. ۇن جانە نان ونىمدەرى ازىق-تۇلىك كورپوراسياسى مەن وڭىرلىك تۇراقتاندىرۋ قورلارىنىڭ رەزەرۆتەرى ارقىلى قامتاماسىز ەتىلگەن»، — دەپ اتاپ ءوتتى پرەمەر-مينيستر.