قازاقستانداعى ءموبيلدى ينتەرنەت جىلدامدىعى رەسەي مەن ورتالىق ازيا ەلدەرىنە قاراعاندا الدەقايدا جىلدام.
Speedtest Global Index دەرەكتەرىنە سايكەس، 2022 جىلدىڭ قىركۇيەك ايىندا قازاقستانداعى ءموبيلدى ينتەرنەتتىڭ ورتاشا جىلدامدىعى 22،6 مب/س-قا دەيىن ۇلعايدى6 دەپ حابارلايدى Almaty-akshamy.kz Finprom.kz سايتىنا سىلتەمە جاساپ.
بۇل وتكەن جىلدىڭ وسى كەزەڭىمەن سالىستىرعاندا 14،5%-عا ارتىق.
ماسەلەن، رەسەيدە بۇل كورسەتكىش 21،4 مب/س-تى قۇراعان. ال، ورتالىق ازيا ەلدەرى اراسىندا ەلىمىزدەن كەيىنگى ورىندا قىرعىزستان (19،6 مب/س) ورنالاسسا، وزبەكستاندا بۇل كورسەتكىش 15،8 مب/س بولعان. ودان كەيىن ۇلكەن ايىرماشىلىقپەن تاجىكستان (7،9 مب/س) ەلى ورنالاسادى. قىركۇيەك ايىندا تۇركىمەنستان بويىنشا دەرەكتەر ۇسىنىلماعان.
بۇل رەتتە الەمدەگى ءموبيلدى ينتەرنەتتىڭ ورتاشا جىلدامدىعى 33،2 مب/س بولعان. تىزىمدە نورۆەگيا، ءباا جانە كاتار ەلدەرى كوش باستادى.
بيىلعى ءبىرىنشى جانە ەكىنشى توقساننىڭ قورىتىندىسى بويىنشا ەڭ جىلدام ءموبيلدى ينتەرنەت بويىنشا Ookla سىيلىعىن ەلىمىزدە Tele2 وپەراتورى الدى. بيىل Tele2-دەگى ءموبيلدى ينتەرنەتتىڭ ورتاشا جىلدامدىعى 27،93 مب/س-تى قۇرادى.
2021 جىلى قازاقستاندا 6 جاستان 74 جاسقا دەيىنگى ينتەرنەت پايدالانۋشىلاردىڭ ۇلەسى 92،9% بولدى.
ەلىمىزدە ءموبيلدى ينتەرنەت جىلدامدىعىنىڭ وسۋىمەن بىرگە ينتەرنەت ترافيكتى تۇتىنۋ كولەمى دە ارتىپ وتىر. بۇل تۇركيا، سينگاپۋر، يتاليا، بەلگيا جانە ت.ب. ەلدەرگە قاراعاندا الدەقايدا جوعارى. مۇنداي كورسەتكىشتەر تەلەكوم سالاسىنداعى قوماقتى ينۆەستيسيالارعا بايلانىستى. مىسالى، وسى جىلدىڭ قاڭتار-شىلدە ايلارىندا بۇل كورسەتكىش 62،6 ملرد تگ، ال 2021 جىلى 128،6 ملرد تگ قۇراعان. سەكتورداعى ينۆەستيسيالاردىڭ ۇلكەن بولىگى بايلانىس وپەراتورلارىنىڭ ءوز قاراجاتى ەسەبىنەن قامتاماسىز ەتىلگەن.