قازاقستاندا مايمىل شەشەگىن دياگنوستيكالاۋدىڭ ادىستەمەسى ازىرلەنۋدە.
ق ر دەنساۋلىق ساقتاۋ ءمينيسترى اجار عينيات ورتالىق كوممۋنيكاسيالار قىزمەتىندە وسىنداي مالىمەت ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مايمىل شەشەگى بويىنشا 89 ەلدە 25 مىڭنان استام جاعداي تىركەلگەن. اۋرۋ اتالعان ەلدەردە كوبىنەسە جەڭىل تۇردە ءوتىپ جاتىر. مىسالى، بۇگىنگى اقپاراتتى قاراساق، 7 ەلدە 8 ءولىم جاعدايى بولعان، ياعني اۋرۋ كەڭ تاراپ جاتقان جەرلەردە - ءبىر ەلدە ءبىر-بىر قايعىلى جاعداي بولعان»، - دەدى مينيستر.
ايتۋىنشا، ءقازىر مينيسترلىك ماماندارى دۇنيەجۇزىلىك دەنساۋلىق ساقتاۋ ۇيىمىنان كەلىپ جاتقان ءاربىر اقپاراتپەن جۇمىس ىستەپ وتىر.
«ۇيىمنىڭ كەڭەسى - مايمىل شەشەگىنە قارسى ارنايى ەكپە جۇرگىزۋدىڭ قاجەتى جوق. سوندىقتان، اتالعان ۇيىم تاراپىنان قانداي دا ءبىر نۇسقاۋ بولسا، سونى ورىنداۋعا تىرىسامىز. ال ءوزىمىز وسى اۋرۋعا ۇقساس سيمپتومدارى بار ناۋقاستارعا مونيتورينگ جۇرگىزىپ جاتىرمىز. سونىمەن بىرگە، اتالعان اۋرۋدىڭ دياگنوزىن قويۋ ءۇشىن دياگنوستيكۋمدار الىپ قويماقپىز. ءوزىمىزدىڭ قىزمەتكەرلەردى ازىرلەپ، وقىتىپ، وسى اۋرۋدى ەمدەۋگە نۇسقاۋ بولاتىن جانە دياگنوستيكا قويۋدىڭ ادىستەمەسىن بەلگىلەيتىن حاتتاما ازىرلەنەدى. ءبىزدىڭ ۇلكەن ماماندارىمىز دۇنيەجۇزىلىك دەنساۋلىق ساقتاۋ ۇيىمىنىڭ وكىلدەرىمەن بىرگە وسى باعىتتا جۇمىس ىستەپ جاتىر»،- دەدى اجار عينيات.