وسى نارىقتىڭ دامۋىن تەجەيتىن بىرنەشە نەگىزگى فاكتور بايقالادى. ماسەلەن، كرەديتتىك رەيتينگتىك اگەنتتىكتەردىڭ قىزمەتىن رەتتەۋدىڭ بولماۋى، جەرگىلىكتى رەيتينگتىك اگەنتتىكتەر قۇرۋ جانە ولاردىڭ جۇمىس ىستەۋى ءۇشىن زاڭنامالىق تالاپتاردىڭ بولماۋى جانە قازاقستاندىق كومپانيالار ءۇشىن، اسىرەسە، ورتا بيزنەس ءۇشىن رەيتينگتىك قىزمەتتەر كورسەتۋدىڭ جوعارى قۇنى جانە شەكتەۋلى قولجەتىمدىلىگى سىندى پروبلەمالار بار.
«وسىعان وراي، قارجى نارىعىن رەتتەۋ جانە دامىتۋ اگەنتتىگى حالىقارالىق تاجىريبەگە سۇيەنە وتىرىپ، كرەديتتىك رەيتينگتىك اگەنتتىك قىزمەتىن رەتتەيتىن زاڭ جوباسىن ازىرلەدى. زاڭ جوباسىندا بىرنەشە جەتەكشى حالىقارالىق ۇيىمنىڭ ۇسىنىستارى ەسكەرىلدى. مىسالى، IOSCO كومپانياسى، ياعني ول باعالى قاعازدار جونىندە كوميسسيالاردىڭ حالىقارالىق ۇيىمىنىڭ ستاندارتتارى. ول ستاندارتتارعا سايكەس رەيتينگتىك اگەنتتىكتەر ءۇشىن كاسىپتىك مىنەز-قۇلىقتىڭ نەگىزگى قاعيداتتارىن ايقىندايدى جانە باعالى قاعازدار نارىعىن رەتتەۋ ماقساتتارىن بەلگىلەيدى»، – دەدى سپيكەر.
سونداي-اق بازەل بانكتiك قاداعالاۋ كوميتەتىنىڭ تالاپتارى دا قاراستىرىلدى، ول بازەل II جانە بازەل III شەڭبەرىندە كرەديتتىك تاۋەكەلدەردى باعالاۋ اگەنتتىكتەرىنە قويىلاتىن بىلىكتىلىك تالاپتارىن ايقىندايدى. وعان قوسا، ەۋروپالىق وداقتىڭ ديرەكتيۆالارى دا
ەسكەرىلدى.
«كرەديتتىك رەيتينگتىك اگەنتتىكتەر تۋرالى» زاڭ جوباسىندا نەگىزگى حالىقارالىق ينستيتۋتتار ۇسىنعان كرەديتتىك رەيتينگتىك اگەنتتىكتەردىڭ قاعيدالارى قامتاماسىز ەتىلگەن. ماسەلەن، قۇجات وبەكتيۆتىلىك، تاۋەلسىزدىك، اشىقتىق، اقپاراتتى جاريا ەتۋ، رەسۋرستاردىڭ جەتكىلىكتىلىگى، رەيتينگتىك اگەنتتىكتەردىڭ تۇراقتى قاداعالاۋى مەن ەسەپتىلىگى سياقتى نەگىزگى قاعيداتتارىن قامتاماسىز ەتۋگە باعىتتالادى.
زاڭ جوباسى قارجى سەكتورىن دامىتۋدىڭ 2030 جىلعا دەيىنگى تۇجىرىمداماسىن ىسكە اسىرۋ اياسىندا ازىرلەنگەن جانە كرەديتتىك تاۋەكەلدەردى تاۋەلسىز رەيتينگتىك باعالاۋ ينستيتۋتىن دامىتۋعا جاعداي جاساۋعا باعىتتالعان، بۇل قور نارىعىنىڭ قۇرالدارى ارقىلى بيزنەستى قارجىلاندىرۋ تەتىكتەرىن كەڭەيتۋگە ىقپال ەتەدى.