كوشى-قون زاڭناماسىن بۇزۋدىڭ جولىن كەسۋ ءۇشىن 11 ناۋرىزدان باستاپ ەلىمىزدە “ميگرانت” جەدەل-پروفيلاكتيكالىق ءىس-شاراسى وتكىزىلىپ جاتىر.
پوليسيا شەتەلدىكتەردىڭ تۇراتىن جەرلەرىن، قۇرىلىس وبەكتىلەرىن، بازارلاردى، جالدامالى جۇمىسشىلاردى پايدالاناتىن ۇيىمداردى جانە جۇمىس بەرۋشىلەردى تەكسەرۋدە. وپەراسيانىڭ ەكى كۇنىندە كوشى-قون زاڭناماسىن بۇزۋدىڭ 3093 دەرەگى انىقتالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
207 جۇمىس بەرۋشى شەتەلدىك جۇمىس كۇشىن زاڭسىز پايدالانعانى ءۇشىن، سونداي-اق پوليسيانى وزدەرىنە كەلگەن شەتەلدىكتەر تۋرالى ۋاقتىلى حاباردار ەتپەگەنى ءۇشىن 1117 جەكە جانە زاڭدى تۇلعا جاۋاپقا تارتىلدى. كوشى-قون زاڭناماسىن بۇزۋشىلاردى ەلىمىزدەن شىعارىپ جىبەرۋ تۋرالى 344 سوت شەشىمى شىعارىلدى. 39 شەتەلدىك ەل اۋماعىنان ماجبۇرلەپ شىعارىلدى. ولار ەندى قازاقستانعا بەس جىلعا دەيىن كىرە المايدى. كوشى-قون احۋالىن تالداۋ بارىسىندا شەتەلدىكتەردىڭ ەلىمىزگە زاڭدى تۇردە كىرەتىنى، تەك كەي جاعدايدا كوشى-قون زاڭناماسىن بۇزۋشىلار ساناتىنا اۋىساتىنى جانە بۇعان قازاقستان ازاماتتارىنىڭ كومەكتەسەتىنى انىقتالدى.
قۇقىق بۇزۋشىلىقتاردىڭ ەداۋىر بولىگى شەتەلدىكتەردى ءتيىستى قۇجاتتارسىز جۇمىسقا تارتۋمەن بايلانىستى. مىسالى، تۇركىستان وبلىسىندا مەكتەپ سالۋمەن زاڭسىز اينالىسقان 20 شەتەلدىك انىقتالدى. ماڭعىستاۋ وبلىسىنىڭ تاس كەنىشىندە رۇقسات قۇجاتتارىنسىز جۇمىس ىستەگەن وزبەكستاننىڭ 36 ازاماتى انىقتالدى. وسىعان ۇقساس فاكتىلەر الماتى، شىمكەنت قالالارىندا، اقتوبە، الماتى، اتىراۋ، شىعىس قازاقستان جانە سولتۇستىك قازاقستان وبلىستارىندا اشكەرەلەندى. بارلىق قۇقىق بۇزۋشىلار جاۋاپقا تارتىلدى.
جامبىل وبلىسىندا التى شەتەلدىك ازاماتقا قىرعىزستاننان زاڭسىز كوشى-قون ارناسىن ۇيىمداستىرعان ەكى قازاقستاندىق ازامات انىقتالدى. وسى فاكتى بويىنشا سوتقا دەيىنگى تەرگەپ-تەكسەرۋ جۇرگىزىلۋدە. الماتى قالاسىندا افريكا كونتينەنتىنەن كەلگەن ەكى ايەلدىڭ زاڭسىز بودي-ماسساج جاساۋمەن اينالىسقانى انىقتالدى. بۇدان بولەك ەكى كۇن ىشىندە ىزدەۋدە جۇرگەن 19 شەتەلدىك قىلمىسكەر قۇرىقتالدى، ولار ءبىزدىڭ ەلىمىزدە جاسىرىنباق بولعان. سونىمەن قاتار پوليسيا مەملەكەتتىك شەكارانى زاڭسىز كەسىپ ءوتۋ جانە ەلدە زاڭسىز بولۋ بويىنشا سەگىز فاكتىنى انىقتادى. كوشى-قون زاڭناماسىن بۇزۋشىلىقتاردىڭ الدىن الۋ جانە انىقتاۋ بويىنشا جۇمىس جالعاساتىن بولادى.
اقپارات كوزى Polisia.kz سايتىندا: https://polisia.kz/qazaqstanda-migrant-zhedel-profilaktikalyq-is-sharasy-otkizilip-zhatyr/