قاراعاندى وبلىسىندا سپيرتتىك ىشىمدىكتەن باس تارتقان اۋىل بار.
ەلدى مەكەندە ءبىر جىل بويى قۇقىقبۇزۋشىلىق تىركەلمەگەن. بۇل باستامانى اۋىل اكىمى مەن ۋچاسكەلىك پوليسەي اقساقالدار القاسىنا ۇسىنىپ، تۇرعىندار تۇگەل قولداعان، دەپ حابارلايدى Almaty-akshamy.kz.
الىبەك وسپانوۆ تىكەنەكتى اۋىلىندا 8 جىلدان بەرى ۋچاسكەلىك پوليسەي بولىپ جۇمىس ىستەيدى. جەرگىلىكتى تۇرعىنداردىڭ ءبارىن تانيدى. قاۋىپسىزدىك شارالارىن قاشاندا نازاردا ۇستاۋدى ەسكەرتىپ وتىرادى. ول 1 جىل بۇرىن ىشىمدىكتەن باس تارتۋدى ۇسىنعان. باستاماسىن بۇكىل اۋىل قۇپ كورگەن.
«ءبىزدىڭ اۋىلدا پوليسيا بار، ءجيى-جيى تەكسەرەدى. ەندى ۇلكەن باسىمىزبەن شەشەسىندەي ادامبىز، ول بالادان ءسوز الىپ، سوگىس العانشا، وسىلاي ىشىمدىكسىز، شىلىمسىز ساۋدامىزدى جاساپ جاتىرمىز»، - دەيدى جەكە كاسىپكەر رىستى سارسەكەيەۆا.
«وسى اۋىلدا اراق ساتىلمايدى. اراق ىشەتىن ادام جوق. سودان كەيىن اۋىلدا وڭدى، ءبارى كەڭەسىپ، اقىلداسىپ شەشەمىز شارۋانىڭ ءبارىن»، - دەيدى اۋىلدىق اقساقالدار كەڭەسىنىڭ ءتوراعاسى ءومىر بۇركىتبايەۆ.
ەسەسىنە اۋىل جاستارى بوس ۋاقىتىن پايدالى ىسكە جۇمسايدى. كوبى ونەرگە قۇمارتىپ ءوسىپ كەلەدى. دومبىرا ۇيىرمەسىنە كەلەتىندەر كوبەيگەن. ۇلكەندەر دە جاستاردىڭ ءار ءبىر تالپىنىسىن قولداپ وتىرادى. ۋچاسكەلىك پوليسەي بولسا، بۇل باستاماسىن وزگەلەرگە دە ناسيسحاتتاۋعا نيەتتى.
«جالپى، تىكەنەكتى اۋىلىندا 222 تۇرعىن تۇرادى. قوعامدىق كەڭەس ءتوراعاسى، اكىمىمىز بار كەزدەسىپ، قىلمىستىق ءىستىڭ الدىن الۋ، جاستاردى دۇرىس باعىتقا باعىتتاۋ ءۇشىن بىرىگىپ جۇمىس اتقارىپ وتىرمىز»، - دەيدى ۋچاسكەلىك پوليسيا ينسپەكتورى الىبەك وسپانوۆ.
تىكەنەكتى اۋىلىنىڭ ۇلگىلى باستاماسى كوپكە ۇلگى. كۇنى كەشە قاراعاندى وبلىسىنا كەلگەن ىشكى ىستەر ءمينيسترى مارات احمەتجانوۆ شالعايداعى اۋىل اكىمى ەرلان وسپانوۆقا «قوعامدىق ءتارتىپتى قامتاماسىز ەتۋگە قوسقان ۇلەسى ءۇشىن» مەدالىن تابىستادى. ال، اۋىل تۇرعىندارى بۇل ماراپات بۇكىل اۋىلعا كورسەتىلگەن قۇرمەت دەپ بىلەدى.