دەرەكتى فيلم «ەۆا. باتىر قىز» دەپ اتالادى.
قازاقستاندا كوكپارشى قىز ەۆا جيگالينا جايلى «ەۆا. باتىر قىز» اتتى دەرەكتى فيلم ءتۇسىرىلدى. بۇل بالا كەزىنەن دالا توسىندە ويقاستاپ، بار مادەنيەتىن بويىنا ءسىڭىرىپ وسكەن تاباندى قىزدىڭ ءوزىنىڭ سۇيىكتى ىسىمەن اينالىسۋ حاقى ءۇشىن كۇرەسى تۋرالى وقيعا، دەپ حابارلايدى Almaty-akshamy.kz.
فيلم پروديۋسەرىنىڭ سوزىنشە، تۋىندىنى شەتەلدە ۇسىنۋعا بولادى، ويتكەنى تۋىندىنىڭ الەۋەتى جوعارى دەڭگەيدە.
ءداستۇرلى قاساڭ قوعامدا ايەلدەرگە كوكپارعا قاتىسۋعا قاتاڭ تىيىم سالىنعان. ءبىراق ەۆا قيىندىقتارعا مويىماستان تاباندىلىق تانىتىپ، ستەرەوتيپتەردى بۇزدى، الەۋمەتتىك جانە مادەني توسقاۋىلداردى ەڭسەرە ءبىلدى. ول، كوكپار تەك ەرلەردىڭ ويىنى دەگەن مىقتىلارمەن تەكەتىرەستە بولدى. دەگەنمەن، ەۆانى قولدايتىندار دا تابىلىپ، ونىڭ جىگەرىنە، ارمانىنا ادال مىنەزىنە لايىقتى باعاسىن بەرە الدى. ولار ەۆانى جىگەرلەندىرىپ، توسقاۋىلدارعا توتەپ بەرۋىنە كومەگىن ايامادى. ەۆا كادىمگى قارا كۇشتەن دە، ەپتەن دە كەندە ەمەس؛ ال ونىڭ ىشكى جىگەرى، جالىنى مەن تاباندىلىعى - كورگەن ادامدى قاناتتاندىرادى.
فيلم كورەرمەندى ەموسيالىق ساياحاتقا ءۇيىرىپ اكەتىپ، سول ۋاقىتتا - كەيىپكەردىڭ الدىنداعى قيىندىقتاردى، ونىڭ سايگۇلىككە دەگەن ماحابباتىن پاش ەتەدى.
«اتا-انام كوكپارعا قاتىسۋعا تىيىم سالعان. ءبىراق ءبىر جەردە كوكپار بولىپ جاتىر دەسە دەلەبەم قوزىپ، ۇيدەن قاشىپ كەتەتىنمىن. كوكپارعا العاش رەت 15 جاسىمدا قاتىستىم. شاقىرۋسىز بارعان ەدىم. ءوزىم دە تاڭ قالدىم. اتتا وتىرىپ، ەرلەردىڭ كوكپاردا جان الىپ، جان بەرگەنىن كوردىم. ولارعا قوسىلا كەتىپ، سەركەنى تارتىپ الىپپىن. ەرلەر مەنى قۋا جونەلدى، ءبىراق ۇستاتپاي كەتتىم. ءقازىر جۇرتتىڭ كوكپارعا قىزىعۋى ارتقانىن كورىپ ءجۇرمىن. ماعان ۇلدار دا، قىزدار دا حات جازىپ، ۇيرەتشى دەپ جاتادى»، - دەيدى ەۆا جيگالينا.
«ەۆا. باتىر قىز» دەرەكتى دراماسى تەمىربەك امانجولدىڭ رەجيسسەرلىك العاشقى قادامى. تەمىربەكتىڭ ءوزى دە اتپەن ءتۋريزمدى جانە اتقا وتىرۋ مادەنيەتىن زەرتتەپ ءجۇر. ەۆانىڭ حيكاياسى - ءسالت-داستۇر، جىگەر مەن قۇرباندىق شيەلەنىسكەن الەمگە شىتىرمان ساياحات. وسىنداي قىم-قۋىت الەمدە نازىك جان اعىسقا قارسى ءجۇزىپ، ماحاببات پەن جالىننىڭ المايتىن قامالى جوعىن ايشىقتايدى دەيدى ول.
«12 جىلدان بەرى اتتاردى فيلمدەرگە ءتۇسىرىپ، اتقا وتىرۋ مادەنيەتىن، نەونوماديزمدى زەرتتەپ ءجۇرمىن. «ەۆا. باتىر قىز» فيلمىندە قازاقىلىقتىڭ فورمۋلاسىن پاش ەتكىم كەلەدى. ەلى بوتەن، ءدىنى بوتەن باسقا جۇرتتار نەلىكتەن وسى ويىنعا عاشىق بولىپ، بار ءومىرىن سارپ ەتكىزۋگە بار؟ كوكپار مەن اتتار نەسىمەن تارتادى؟ ەڭبەكتى وسى سۇراقتارعا جاۋاپ ىزدەيتىن زەرتتەۋ دەسەڭىز دە بولادى»، - دەيدى تەمىربەك امانجول.
ءفيلمنىڭ پروديۋسەرى دۋمان قوجاحمەتتىڭ ايتۋىنشا، وسى ءفيلمنىڭ حالىقارالىق دەڭگەيگە شىعۋعا الەۋەتى مول. ءقازىر بىرنەشە شەتەلدىك ستريمينگ-سەرۆيستەرمەن پروكات تۋرالى كەلىسسوزدەر ءجۇرىپ جاتىر دەيدى ول.
دەرەكتى ءفيلمدى Black & White Production كومپانياسى ق ر مادەنيەت جانە سپورت مينيسترلىگىنىڭ تاپسىرىسىمەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن 2022 جىلى ءتۇسىردى.
