ق ر پرەمەر-مينيسترىنىڭ ورىنباسارى تامارا دۇيسەنوۆانىڭ توراعالىعىمەن وتكەن كەڭەستە ەلەكتروندىق كىتاپحانا جۇيەسىنىڭ دامۋى تالقىلاندى.
جيىنعا مادەنيەت جانە اقپارات، سيفرلىق دامۋ، يننوۆاسيالار جانە اەروعارىش ونەركاسىبى مينيسترلىكتەرى، ۇلتتىق اكادەميالىق كىتاپحانانىڭ وكىلدەرى قاتىستى، دەپ حابارلايدى Almaty-akshamy.kz
بۇگىندە ەلىمىزدە 11 مىڭنان اسا كىتاپحانا ءتۇرلى اقپاراتتىق جۇيەلەر مەن كاتالوگتاردى قولدانىپ كەلەدى. ەلىمىزدەگى كىتاپ قورىن جۇيەلەۋ ءۇشىن ءبىرىڭعاي اۆتوماتتاندىرىلعان پلاتفورما جاساقتاۋ جۇمىسى باستالدى. مامانداردىڭ سوزىنشە، ونىڭ ارقاسىندا وقىرماندار قاجەتتى كىتاپتى نەمەسە ونىڭ ەلەكتروندى نۇسقاسىن وڭاي تابا الادى. جۇيەنى ەنگىزۋ اياسىندا بارلىق كىتاپحاناعا كىرۋ مۇمكىندىگى قاراستىرىلعان ءبىرىڭعاي ەلەكتروندى وقىرمان بيلەتى ازىرلەنەدى. قولدانۋشىلار ەلەكتروندى ۇكىمەت پورتالى ارقىلى تىركەلىپ، بيلەتكە قول جەتكىزبەك.
پلاتفورمادا كىتاپ قورىن ونلاين تولىقتىرۋ فۋنكسياسى قاراستىرىلعان. ونى جەكە باسپالار دا پايدالانا الادى: جارىق كورگەن جاڭا تۋىندىلار جۇيەگە ەنگىزىلىپ، اقىلى جازىلۋشىلارعا قولجەتىمدى بولماق. وسىلايشا جەكە باسپالار مەن اۆتورلاردىڭ مۇددەلەرىن قورعاۋ جوسپارلانعان.
«ءبىز ەلدەگى باسپالار وكىلدەرىمەن كەزدەسىپ، كىتاپتاردى جاريالاۋ ءتارتىبىن تۇسىندىردىك. ولار ۇسىنىلعان شارتتارعا كەلىسىم بەردى»، — دەدى مادەنيەت جانە اقپارات ۆيسە-مينيسترى ارمان جۇدەبايەۆ.
پلاتفورمانى پيلوتتىق رەجيمدە 2024 جىلى ىسكە قوسۋ جوسپارلانعان. باستاپقىدا ول ءىرى كىتاپحانالار بازاسىندا جۇمىس ىستەي باستايدى.
«سيفرلىق پلاتفورما ەلىمىزدەگى بارلىق كىتاپ قورى ازاماتتارعا قولجەتىمدى بولۋى ءۇشىن ازىرلەنىپ وتىر. سوندىقتان ەڭ الدىمەن ەلەكتروندى نۇسقاعا 10 ءىرى كىتاپحانا وتەدى. ال قالعاندارى سايكەستەندىرۋ جۇمىستارىن قولعا الۋى كەرەك. كىتاپ قورى تولىقتاي سايكەس كەلگەن جاعدايدا كىتاپحانالار وقىرمانعا ارنالعان ىزدەۋ باعدارلاماسىن بەيىمدەۋى ءتيىس»، — دەپ اتاپ ءوتتى تامارا دۇيسەنوۆا.