وتكەننىڭ كەلمەسىنە كەتكەن كۇندەردى اڭسايتىندار ءالى دە ارامىزدا بار سياقتى...
بۇلاي دەۋگە جاقىندا ەلىمىزدىڭ سولتۇستىگىندە ورىس تىلىندە شىعاتىن «سيەۆەرنىي كازاحستان» گازەتىنىڭ ايقارا بەتىندە جاريالانعان جازبالار سەبەپ بولىپ وتىر. وندا بۇگىنگى ۇرپاق مۇلدە تانىمايتىن، تۇسىنبەيتىن جات تۇسىنىكتەر: «كومسومول»، «ۆلكسم» دەگەن سوزدەرگە تولى تاريح قويناۋىنا كەتكەن كۇندەرىن ساعىنعان جانداردىڭ جۇرەكجاردى پىكىرلەرى بەرىلىپتى.
بۇل تۋرالى Facebook قولدانۋشىسى مەرۋەرت كەڭەسبەك قىزى ءوزىنىڭ پاراقشاسىندا جاريالاعان.
«ەلدىڭ سولتۇستىگىندە شىعاتىن «سيەۆەرنىي كازاحستان» گازەتى ايقارا بەتىن اڭساۋعا تولى ماقالاعا تولتىرىپتى. ۆلكسم- مەملەكەتتىك مەرەكە مە ەدى؟» - دەگەن پىكىر قالدىرىپتى جازبا يەسى.
جازبانىڭ سوڭىنداعى پىكىرلەر بولىمىندە اۆتوردىڭ «مىناداي تۇسىنىكتەگى پەندەلەر باردا ءبىزدىڭ ەل بولۋىمىز قيىن-اۋ...» دەگەن كەيىستىگى دە بايقالادى.
ەلىمىزدە وسىعان ۇقساس جاعدايلار قىلاڭ بەرىپ بەرىپ جۇرگەنى ءبىرىنشى رەت ەمەس.
ەستەرىڭىزگە سالا كەتەيىك، 19 ناۋرىز كۇنى پەتروپاۆلداعى كوللەدجدەردىڭ بىرىندە ءبىر توپ ادام جيىن وتكىزىپ، «حالىق كەڭەسىن» قۇرعانىن مالىمدەدى. جينالعاندار ۇيىم قۇرىپ، وزدەرىن ەلدەن ەگەمەن ۇيىم رەتىندە جاريالايتىنىن ايتقان ەدى.
الىنعان ماتەريالدار بويىنشا سوت پسيحولوگيالىق-فيلولوگيالىق ساراپتاماسى جۇرگىزىپ، ونىڭ قورىتىندىسى بويىنشا ماتەريالداردا قازاقستان رەسپۋبليكاسىن ىدىراتۋدى ناسيحاتتاۋ، مەملەكەت قاۋىپسىزدىگىنە نۇقسان كەلتىرۋ، ونىڭ اۋماعىنىڭ تۇتاستىعى مەن بىرلىگىن بۇزۋدى ناسيحاتتاۋ بەلگىلەرى بار ەكەنىن ايتقان بولاتىن.
ال «سيەۆەرنىي كازاحستان» باسىلىمى نەنى ساعىنىپ ءجۇر؟