بىلتىر شىعارىلعان قالدىقتىڭ 21،1 پايىزى قايتا وڭدەلدى
ەلىمىزدە جىلىنا 4،5 ملن توننا قالدىق شىعارىلادى. بۇل تۋرالى ەكولوگيا ۆيسە-مينيسترى ءزۇلفيا سۇلەيمەنوۆا ءمالىم ەتتى، دەپ حابارلايدى Almaty-akshamy.kz.
«جىل سايىن 4،5 ملن توننا قالدىق شىعارىلادى. بىلتىر 4،2 ملن توننا قوقىس توگىلدى. ونىڭ 21،1% قايتا وڭدەلدى. بيىل بۇل كورسەتكىش 24%-كە جەتەدى دەپ جوسپارلاپ وتىرمىز. وڭ ديناميكا بايقالعانىمەن، جەتىسپەي جاتقان تۇستار دا بار. ماسەلەن، قوقىس كەيبىر ايماقتاردا كوپ، كەيبىر ايماقتاردا وتە از وڭدەلەدى»، – دەپ ءمالىم ەتتى ءزۇلفيا سۇلەيمەنوۆا.
ۆيسە-مينيستر اقپاراتىنا ساي ەندى ۆەدومستۆو ءقاۋىپتى قالدىقتاردى وڭدەۋ جانە ولاردى جويۋمەن اينالىساتىن كومپانيالاردىڭ جۇمىسىنا باقىلاۋ جۇرگىزەتىن بولادى. ەكولوگيالىق كودەكسكە وزگەرىس ەنگىزۋ تۋرالى شەشىم ماڭىزدى بولدى. سەبەبى بۇل ۋاقىتقا دەيىن نارىقتا قوقىس شىعارۋ، وڭدەۋ جانە سۇرىپتاۋمەن اينالىساتىن بيزنەس سۋبەكتىلەرى بەلگىسىز ەدى. ەندى شاعىن كاسىپورىندار قالدىقتاردى شىعاراتىن بولسا، وندا ونى قاي جەرگە توگەتىنى تۋرالى ەكولوگيا مينيسترلىگىنە حابارلاما بەرەدى.
«بۇرىن بەلگىلەنبەگەن ورىندارعا قوقىس توگۋ فاكتىلەرى كوپ تىركەلگەن ەدى. ماسەلەن، بىلتىر 7 مىڭنان استام رۇقسات ەتىلمەگەن قالدىقتاردى توگۋ ورنى انىقتالدى. ونىڭ 89% جويىلدى. ال بيىل مامىر ايىنان باستاپ 1،5 مىڭعا جۋىق رۇقسات ەتىلمەگەن ۇيىندىلەر انىقتالدى»، – دەدى ءزۇلفيا سۇلەيمەنوۆا.
بۇگىندە اسا ءقاۋىپتى قالدىقتاردى جويۋمەن اينالىساتىن 60-قا جۋىق كومپانيا ليسەنزيا العان. ال جالپى قوقىستى شىعارۋ، وڭدەۋ جانە سۇرىپتاۋ قىزمەتىن كورسەتەتىن 990-نان استام بيزنەس سۋبەكتىسى بار.