قايعىلى جاعدايلار ادامدارعا سوندا دا ساباق بولماي تۇر.
ابايسىزدا سۋعا كەتەتىندەردىڭ 100-گە جۋىعى - ورىمدەي بالالار، دەپ حابارلايدى Almaty-akshamy.kz.
وكىنىشكە قاراي، بۇل قابىلدانىپ جاتقان شارالاردىڭ جەتكىلىكسىز ەكەنىن كورسەتەدى. بۇل تۋرالى ۇكىمەت وتىرىسىندا ايتىلدى. بيىل، جىل باسىنان بەرى 45 ادامنىڭ اجالى سۋدان بولعان. ولاردىڭ 14ء-ى - كامەلەتكە تولماعاندار. توتەنشە جاعدايلار ءمينيسترى يۋريي ءيليننىڭ ايتۋىنشا، قايعىلى جاعدايلاردىڭ كوبى ارنايى جابدىقتالماعان جاعاجايلاردا بولادى. ءارى بالالاردى قاراۋسىز قالدىرۋ، ماس كۇيىندە شومىلۋ دا وقىس وقيعاعا سەبەپ بولىپ وتىر. ۆەدومستۆو مالىمەتىنشە، ماۋسىمنىڭ بەس كۇنىنىڭ وزىندە 17 ادام سۋعا باتىپ كەتكەن.
«بۇل - شىنىمەن دە الاڭداتارلىق جاعداي. ءقازىر شومىلۋ ماۋسىمىنا دايىندىق جۇمىستارى جالعاسىپ جاتىر. وڭىرلەردە شومىلۋعا قاجەتتى ارنايى ورىندار جابدىقتالىپ، جاڭا جاعاجايلار سالىنىپ جاتىر. سونداي-اق قاۋىپسىزدىكتى قامتاماسىز ەتۋ ءۇشىن پروفيلاكتيكالىق جۇمىستار ءجۇرىپ جاتىر. سوعان قاراماستان، سۋداعى قايعىلى جاعدايلار ازايماي وتىر. وكىنىشكە قاراي، ەلىمىزدە جىل سايىن 300-گە جۋىق ادام سۋعا كەتىپ، قايتىس بولادى. ونىڭ 100-گە جۋىعى - بالالار. بۇل قابىلدانىپ جاتقان شارالاردىڭ جەتكىلىكسىز ەكەنىن كورسەتەدى»، - دەيدى ق ر پرەمەر-مينيسترى ءاليحان سمايىلوۆ.