Cءاۋىر-ماۋسىم ارالىعىندا ەل بويىنشا 452 مىڭ جۇمىسسىز ادام تىركەلگەن
قازاقستاندا بوس جۇرسە دە، جۇمىس ىزدەۋگە تالپىنبايتىن 51،5 مىڭ ادام تىركەلگەن. بۇل تۋرالى ءساۋىر-ماۋسىم ايلارىنىڭ قورتىندىسىن جاريالاعان ۇلتتىق ستاتيستيكا بيۋروسى ءمالىم ەتتى، دەپ حابارلايدى Almaty-akshamy.kz.
«2022 جىلدىڭ ەكىنشى توقسانىندا ەكونوميكانىڭ ءتۇرلى سالالارى بويىنشا 8،8 ملن ادام جۇمىسپەن قامتىلدى. ونىڭ ىشىندە 6،7 ملن – جالدامالى قىزمەتكەر، ال 2،1 ملن ادام ءوزىن-وزى جۇمىسپەن قامتىعان. بۇل – وتكەن جىلدىڭ سايكەس كەزەڭىمەن سالىستىرعاندا 23،1 مىڭ ادامعا كوپ. جۇمىسسىز جۇرسە دە، قىزمەت ىزدەمەگەن نەمەسە جۇمىس ىستەۋگە دايىن ەمەس ادامدار بيىلعى جىلدىڭ I توقسانىمەن سالىستىرعاندا 18،4 پايىزعا ازايدى – 51،5 مىڭ ادام. ونىڭ ىشىندە 15-28 جاستاعىلار اراسىنداعى جۇمىسسىزدىق دەڭگەيى – 3،8 پايىز. ال، NEET ساناتىنداعى جاستار اراسىندا جۇمىسسىزدىق كورسەتكىشى – 6،5 پايىز»، - دەپ ءمالىم ەتتى ۇلتتىق ستاتيستيكا بيۋروسىنان.
بيۋرو دەرەگىنشە، ءساۋىر-ماۋسىم ارالىعىندا ەل بويىنشا 452 مىڭ جۇمىسسىز ادام تىركەلگەن.
ەسكە سالا كەتسەك، بۇعان دەيىن 5 مىڭعا جۋىق ەلوردالىق جۇمىسسىز رەتىندە تىركەۋدە تۇرعانىن حابارلاپ ەدىك.