ەلىمىزدە جاستارعا ارنالعان قانداي جەڭىلدىكتەر بار؟

№1. تۇرعىن ءۇي باعدارلامالارى

جاستارعا ارنالعان وڭىرلىك يپوتەكالار

قازاقستاندا 35 جاسقا دەيىنگى جاستارعا ارنالعان وڭىرلىك تۇرعىن ءۇي باعدارلامالارى جۇمىس ىستەيدى. ازىرگە مۇنداي باعدارلامالار الماتى، استانا، شىمكەنت قالالارىندا جانە جامبىل، جەتىسۋ، اتىراۋ، اقتوبە، الماتى، اتىراۋ، قاراعاندى، اباي، ۇلىتاۋ، اقمولا وبلىستارىندا ىسكە قوسىلسا، قالعان وڭىرلەردە دە جىل سوڭىنا دەيىن قولعا الۋ جوسپارلانعان. 

وڭىرلەردىڭ ەرەكشەلىگىنە بايلانىستى تۇرعىن ءۇي باعدارلامالارىنىڭ شارتى اركەلكى. دەگەنمەن، بارىنە ورتاق پايىزدىق مولشەرلەمە – 5%. 

جاستارعا ارنالعان وڭىرلىك يپوتەكالاردىڭ شارتىمەن ينفورمبيۋرونىڭ ارنايى ماتەريالىنان وقۋعا بولادى. 

جۇمىس ىستەيتىن جاستارعا ساتىپ الۋ قۇقىعىنسىز جالعا بەرۋ

بۇعان تەك استانا، الماتى، شىمكەنت قالاسىنداعى 29 جاسقا دەيىنگى جۇمىس ىستەيتىن جاستار قاتىسا الادى. پاتەردى اي سايىنعى جالداۋ اقىسى – 5 مىڭ تەڭگەدەن 15 مىڭ تەڭگەگە دەيىن. جالداۋ مەرزىمى – 5 جىل. 

قاتىسۋشىلارعا قويىلاتىن تالاپتار:

• استانا، الماتى جانە شىمكەنت قالالارىندا سوڭعى 2 جىلدان كەم ەمەس تۇراقتى تىركەلۋ؛


• ءوتىنىش بەرۋشىنىڭ جانە ونىڭ وتباسى مۇشەلەرىنىڭ اپاتتى تۇرعىن ءۇيدى قوسپاعاندا، سوڭعى 2 جىل ىشىندە جەكە باسپاناسى بولماۋى؛


• اياقتالعان ورتا، ورتا ارناۋلى، جوعارى نەمەسە جوعارى وقۋ ورنىنان كەيىنگى ءبىلىم؛


• رەسمي جۇمىس؛


• ءوتىنىش بەرۋشىنىڭ سوڭعى 6 ايداعى تابىسى كەمىندە 40 اەك (138 مىڭ تەڭگە) بولۋى كەرەك.

جىل سايىن باعدارلاماعا 1 مىڭ جاڭا پاتەر بەرىلەدى.

№2. جەڭىلدەتىلگەن كرەديتتەر

2،5 پايىزدىق شاعىن نەسيە

1 ناۋرىزدا 15 وڭىردە قۇجات قابىلداۋ باستالدى. قازاقستاننىڭ 20 ايماعىنا 5800 نەسيە بولىنەدى جانە ول ءار ءوڭىردىڭ سۇرانىسىنا قاراي انىقتالادى. كەيبىر ايماقتا سۇرانىس كوپ، كەيبىر ايماقتا سۇرانىس از بولۋى مۇمكىن. 1 ناۋرىزدان بەرى 15 وڭىردە قۇجاتتاردى قابىلداۋ باستالدى. اكىمدىكتەردىڭ باستاماسىمەن ناۋرىز ايىنىڭ اياعىنا دەيىن ءتورت وڭىردە، ءساۋىر ايىنىڭ باسىندا ەڭ سوڭعى جيىرماسىنشى وڭىردە باعدارلاما ىسكە قوسىلادى. 

نەسيەلەۋ شارتتارى:

• نەسيە سوماسى – 5 ملن تەڭگەگە دەيىن؛


• سىياقى مولشەرلەمەسى – جىلدىق 2،5%؛


• نەسيە مەرزىمى: مال شارۋاشىلىعىن دامىتۋعا – 7 جىلعا دەيىن؛


• بيزنەستىڭ باسقا باعىتتارى ءۇشىن – 5 جىلعا دەيىن؛

نەگىزگى بورىش پەن سىياقىنى وتەۋ كەزىندە شاعىن نەسيە مەرزىمىنىڭ ۇشتەن بىرىنە دەيىن جەڭىلدىك كەزەڭ قاراستىرىلعان. نەسيە الۋ ءۇشىن كەپىلگە مۇلىك قويۋ مىندەتتى.

№3. جۇمىسقا تۇرعىزۋ باعدارلامالارى

جاستار پراكتيكاسى

باعدارلاما ماماندىعى بويىنشا تەحنيكالىق جانە كاسىپتىك، ورتا بىلىمنەن كەيىنگى، جوعارى، جوعارى وقۋ ورنىنان كەيىنگى ءبىلىم بەرۋ باعدارلامالارىن ىسكە اسىراتىن ءبىلىم بەرۋ ۇيىمدارىنىڭ، وقۋدى اياقتاعان كەيىنگى 3 جىل ىشىندەگى جانە 35 جاستان اسپاعان تۇلەكتەرى قاتارىنداعى جۇمىسسىزدارعا ارنالعان. ولار ءبىر جىل بويى بەكىتىلگەن تىزىمدەگى ۇيىمدا اقىلى تاجىريبەدەن وتەدى. ول ءۇشىن جاستارعا 100 مىڭ تەڭگەگە جۋىق ايلىق بەرىلەدى.

باعدارلاماعا قاتىسۋ ءۇشىن حالىقتى جۇمىسپەن قامتۋ ورتالىقتارىنا «جاستار پراكتيكاسىن» ۇيىمداستىرۋ جانە قارجىلاندىرۋ قاعيدالارىنا سايكەس نىسان بويىنشا ءوتىنىش بەرۋ قاجەت.

تولىعىراق مىنا جەردە. 

العاشقى جۇمىس ورنى

35 جاستان اسپاعان جاستار ءۇشىن ءبىرىنشى جۇمىس ورنىندا كاسىبي ءبىلىم مەن داعدىلاردى بەرۋگ ارنالعان باعدارلاما. ءبىرىنشى جۇمىس ورنىنداعى جۇمىس ۇزاقتىعى 18 ايدان اسپايدى، اياقتالعاننان كەيىن قاتىسۋشىعا كەمىندە 12 اي مەرزىمگە تۇراقتى جۇمىس ورنى بەرىلەدى. جالاقى كەمىندە 103 مىڭ تەڭگەنى (30 اەك) قۇرايدى. 

جولداما الۋ ءۇشىن تۇرعىلىقتى جەرى بويىنشا حالىقتى جۇمىسپەن قامتۋ ورتالىعىنا جۇگىنۋ قاجەت.

تولىعىراق مىنا جەردە.

پرەزيدەنتتىك جاستار كادرى رەزەرۆى

جوبادا بارىنشا دايارلانعان جانە تاجىريبەلى جاستار ءۇشىن مەملەكەتتىك باسقارۋ جانە كۆازيمەملەكەتتىك سەكتور جۇيەسىندە باسشىلىق قىزمەتكە تۇرۋعا بىرەگەي مۇمكىندىك اشۋ ماقساتى كوزدەلگەن. وعان جاسى 35-تەن اسپاعان، جوعارى ءبىلىمى بار، ەڭبەك ءوتىلى 5 جىلدان كەم ەمەس، مەملەكەتتىك ءتىلدى ۆ1 دەڭگەيىندە بىلەتىن قازاقستان رەسپۋبليكاسىنىڭ ازاماتتارى قاتىسا الادى. 

تولىعىراق مىنا جەردە.

№4. شاكىرتاقىلار مەن ءبىلىم بەرۋ باعدارلامالارى

«بولاشاق» شاكىرتاقىسى

قازاقستاندىق جاستار «بولاشاق» حالىقارالىق باعدارلاماسى ارقىلى شەتەلدە ماگيستراتۋرا، دوكتورانتۋرا جانە رەزيدەنتۋرادا وقي الادى. ستيپەنديا يەگەرلەرى اۋستراليي، بەلگيا، ۇلىبريتانيا، گەرمانيا، دانيا، يزرايل، يرلانديا، يسپانيا، يتاليا، كانادا، جۇڭگو، گونكونگ، نيدەرلاندى، جاڭا زەلانديا، نورۆەگيا، رەسەي، سينگاپۋر، اقش، فينليانديا، فرانسيا، چەحيا، شۆەيساريا، شۆەسيا، وڭتۇستىك كورەيا، وڭتۇستىك افريكا، جاپونيادا وقۋ مۇمكىندىگىنە يە بولادى.

«قازاقستان حالقىنا» قورىنىڭ شاكىرتاقىسى

وعان ءبىلىم گرانتىن الا الماعان اۋىلدىق جەرلەردەگى جاعدايى تومەن وتباسىلاردان شىققان تۇلەكتەر، جەتىم بالالار جانە مۇگەدەكتىگى بار بالالار قاتىسا الادى. سونداي-اق جوعارى وقۋ ورىندارىندا اقىلى بولىمدەردە وقيتىن ستۋدەنتتەر قوردىڭ قاراجاتى ەسەبىنەن وقۋىن جالعاستىرا الادى. 

قور جىلىنا 1 ميلليون تەڭگەگە دەيىنگى وقۋ اقىسىن وتەيدى. بۇل سومادان اسىپ كەتسە قالعان اقشانى گرانت الۋشى ستۋدەنتتىڭ ءوزى تولەۋگە ءتيىس.

قور بولەتىن گرانتتار وتەۋسىز كومەك بولعاندىقتان اقشا قايتارىلمايدى جانە گرانت الۋشى وقۋىن اياقتاعاننان كەيىن ونىڭ وقۋىنا جۇمسالعان قاراجاتتى «وتەۋگە» مىندەتتى ەمەس.

Taiburyl قوعامدىق بىرلەستىگىنىڭ شاكىرتاقىسى

قوعامدىق بىرلەستىك ستۋدەنتتەردىڭ، عالىمدار مەن زەرتتەۋشىلەردىڭ ءوز سالالارىندا دامۋىنا كومەكتەسەدى. ءتورت باعدارلاماسى بار: ءبىلىمدى، زەرتتۋشىلەردى جانە دارىندىلاردى قولداۋ، بيزنەس جانە مەملەكەتتىك باسقارۋ بويىنشا قوناق دارىستەر. ستۋدەنتتەر باعدارلامالارعا ونلاين ءوتىنىم بەرە الادى. ءار جوبانىڭ ءوتىنىم قابىلدايتىن ءوز ۋاقىتى بار. 

Shakhmardan Yessenov Foundation شاكىرتاقىسى

اكادەميك شاحماردان ەسەنوۆ اتىنداعى عىلىمي ءبىلىم بەرۋ قورى جىل سايىن 20 ستۋدەنتكە شاكىرتاقى تاعايىندايدى. باعدارلاماعا قازاقستاندىق ۋنيۆەرسيتەتتەردە جاراتىلىستانۋ-عىلىمي، تەحنيكالىق، مەديسينالىق جانە ءىت ماماندىقتارى بويىنشا باكالاۆرياتتىڭ 2-3 كۋرس جانە  ماگيستراتۋرا مەن ينتەرناتۋرانىڭ 1-كۋرس ستۋدەنتتەرى، 18 جاسقا تولعان قازاقستان ازاماتتارى قاتىسا الادى. 

«ورلەۋ» باعدارلاماسى

شاحماردان ەسەنوۆ قورى جوعارى (باكالاۆريات) وقۋ اقىسىن تولەۋ ءۇشىن مەملەكەتتىك نەمەسە وزگە دە گرانتقا يە بولا الماعان، از قامتىلعان وتباسىلاردان شىققان 10 تالاپكەرگە گرانت بولەدى. بايقاۋعا «جاراتىلىستانۋ عىلىمدارى، ماتەماتيكا جانە ستاتيستيكا»، «اقپاراتتىق-كوممۋنيكاسيالىق تەحنولوگيالار»، «ينجەنەرلىك، وڭدەۋ جانە قۇرىلىس سالالارى»، «دەنساۋلىق ساقتاۋ» ماماندىقتارىنا وقۋعا تۇسۋشىلەر قاتىسادى. ءوتىنىم ونلاين قابىلدانادى.

Yessenov Launch Pad

شاحماردان ەسەنوۆ قورى IT-ماماندارعا hard جانە soft skills داعدىلارىن دامىتۋعا ارنالعان 10 گرانت بولەدى. گرانت يەگەرلەرى 12 ايعا دەيىن وقۋدان وتەدى. ول ءۇشىن سايتتا ءونلاين-وتىنىم تولتىرىپ، جەكە كۋالىك، موتيۆاسيالىق حات پەن CV ۇسىنۋى كەرەك. كونكۋرستىق ىرىكتەۋدەن وتكەندەرگە قور ساراپشىلارىنىڭ اراسىنان تالىمگەر تاعايىندالادى. جەڭىمپازدار كۋرستاردى ءوز بەتىنشە ىزدەپ، تالىمگەرلەرمەن وقۋ باعدارلاماسىن كەلىسەدى. سودان سوڭ وقۋدان وتەدى.  

الەم زەرتحانالارىنداعى عىلىمي تاعىلىمداما

 بۇل بايقاۋعا ماماندىعى جاراتىلىستانۋ-عىلىمي نەمەسە تەحنيكالىق ستۋدەنتتەر جانە جۇمىس ىستەپ جاتقان عىلىمي قىزمەتكەرلەر قاتىسا الادى. باعدارلاما 10 ادامعا الەمنىڭ جەتەكشى عىلىمي جانە زەرتتەۋ زەرتحانالارىندا 90 كۇندىك جازعى تاعىلىمدامادان وتۋگە مۇمكىندىك بەرەدى. 

«عىلىم قورىنىڭ» قارجىلاندىرۋى

قور عىلىمي جانە عىلىمي-تەحنيكالىق قىزمەت ناتيجەلەرىن كوممەرسيالاندىرۋدىڭ نەعۇرلىم پەرسپەكتيۆالى جوبالارىن قارجىلاندىرادى. عىلىمي جوبالار ءۇشىن ماتەريالدى-تەحنيكالىق كومەك بەرەدى. گرانتتار تەحنولوگيا، عىلىمي اشىلۋلار، مودەلدەر، جاڭا ماتەريالدار مەن زاتتار بويىنشا جوبالارعا بولىنەدى. 

سونىمەن بىرگە قور جاس عالىمداردىڭ زەرتتەۋلەرىن گرانتتىق قارجىلاندىرۋعا ارنالعان «جاس عالىم» جوباسىن جۇزەگە اسىرادى. ۇزاق دەگەندە 32 ايعا سوزىلاتىن ءبىر جوبانى قارجىلاندىرۋ 19 ميلليون تەڭگەدەن اسپايدى.

باعدارلامالار مەن شاكىرتاقىلار تۋرالى تولىعىراق مىنا جەردە. 

№5. جاستارعا ارنالعان سىيلىقتار

دالا داۋىسى

جوبا كومپوزيتورلاردى قولداۋ ماقساتىمەن قولعا الىنعان. ونىڭ قورىتىندىسى جەلتوقسان ايىندا شىعارىلادى. سىيلىقپەن وپەرا جانرىندا، حالىق اسپاپتارىندا تىڭ تۋىندىلار جازىپ جۇرگەن سازگەرلەر ماراپاتتالادى. سونداي-اق، ونىڭ اياسىندا «رەسپۋبليكا ءانى» اتتى ەسترادالىق ونەر جۇلدەسى دە بەرىلەدى. 

Umai سىيلىعى

قازاقستاننىڭ شىعارماشىلىق ۇجىمدارى مەن جەكەلەگەن ونەر قايراتكەرلەرىنە ەلەۋلى شىعارماشىلىق تابىستارى مەن كاسىبي جەتىستىكتەرى ءۇشىن «تەاتر ونەرى»، «مۋزىكالىق ورىنداۋشىلىق ونەر»، «حورەوگرافيالىق ونەر»، «تەاترداعى بەينەلەۋ ونەرى» سياقتى 4 نوميناسيا بويىنشا تابىس ەتىلەدى. سىيلىقتىڭ جالپى جۇلدە قورى – 54 ملن تەڭگە. بيىل «بالالار جىلىنا» وراي سىيلىق اياسىندا "ۇزدىك بالالار سپەكتاكلى" دەگەن ارنايى جۇلدە تاعايىندالعان. 

«ايبوز» ۇلتتىق ادەبي سىيلىعى

7 اتالىم بويىنشا بەرىلەدى: «ۇزدىك پروزا»، «ۇزدىك پوەزيا»، «ۇزدىك دراما»، «ۇزدىك كوركەم اۋدارما»، «ۇزدىك بالالار ادەبيەتى»، «ۇزدىك كوميكس» جانە «كىتاپتىڭ ۇزدىك ديزاينى». بايقاۋ جۇلدەگەرلەرىنە 5 ميلليون تەڭگەدەن قارجىلاي سىيلىق تابىستالادى. جەڭىمپاز اۆتورلاردىڭ ەڭ­بەك­تەرى 500 دانامەن جارىق كورەدى.

«دارىن» سىيلىعى

بايقاۋ ادەبيەت، عىلىم، ديزاين جانە بەينەلەۋ ونەرى، جۋرناليستيكا، كلاسسيكالىق مۋزىكا، قوعامدىق قىزمەت، سپورت، تەاتر جانە كينو،ەسترادا، حالىق شىعارماشىلىعى اتتى 10 نوميناسيا بويىنشا وتەدى.

سىيلىقتار تۋرالى تولىعىراق مىنا جەردە.