بيىل قازاقتىڭ كورنەكتى كومپوزيتورى، ديريجەر نۇرعيسا تىلەندييەۆتىڭ تۋعانىنا 100 جىل تولادى.
2023 جىلى ازەربايجاندا وتكەن تۇركسوي-عا مۇشە مەملەكەتتەردىڭ مادەنيەت مينيسترلەرى تۇراقتى كەڭەسىنىڭ 40-شى وتىرىسىنىڭ قورىتىندىسى بويىنشا، 2025 جىل ۇلى كومپوزيتوردىڭ 100 جىلدىق مەرەيتويىنا وراي تۇركسوي ۇيىمى اياسىندا نۇرعيسا تىلەندييەۆتى ەسكە الۋ جىلى بولىپ جاريالاندى، دەپ حابارلايدى aqshamnews.kz.
قازاقستاندا جانە شەت ەلدەردە كومپوزيتوردىڭ ءومىرى مەن شىعارماشىلىعىنا ارنالعان ەستەلىك ءىس-شارالار وتۋدە.
نۇرعيسا تىلەندييەۆتىڭ 100 جىلدىعى تۇركيادا دا اتاپ ءوتىلدى. انكارادا تۇركسوي ۇيىمى اياسىندا ەسكە الۋ جىلىنىڭ اشىلۋ سالتاناتى ءوتتى. تۇركى الەمىنىڭ كورنەكتى قايراتكەرىنە ارنالعان ءىس-شارا بارىسىندا نۇرعيسا تىلەندييەۆتىڭ شىعارمالارى ورىندالىپ، ونىڭ ءومىرى مەن شىعارماشىلىعى تۋرالى كورمە قويىلىپ، قىسقامەتراجدى فيلم ۇسىنىلدى.
ق ر ۇلتتىق كىتاپحاناسىندا دا نۇرعيسا تىلەندييەۆتى ەسكە الۋ كەشى ءوتتى.
ءىس-شاراعا كومپوزيتوردىڭ قىزى، ن.تىلەندييەۆ اتىنداعى «وتىرار سازى» مەملەكەتتىك اكادەميالىق فولكلورلىق-ەتنوگرافيالىق وركەسترىنىڭ كوركەمدىك جەتەكشىسى جانە باس ديريجەرى دينارا تىلەندييەۆا، سونداي-اق كونسەرۆاتوريا، مۋزىكالىق كوللەدج ستۋدەنتتەرى مەن مەكتەپ وقۋشىلارى، كىتاپحانا وقىرماندارى مەن كەش قوناقتارى قاتىستى.
كەزدەسۋدە «وتىرار سازى» وركەسترى نۇرعيسا تىلەندييەۆتىڭ شىعارمالارىن ورىندادى. سونداي-اق، «ءداۋىر ءۇنى – نۇر-اعا» كىتاپ كورمەسى ۇيىمداستىرىلىپ، كىتاپحانانىڭ ۇلكەن زالىندا كومپوزيتوردىڭ مەموريالدىق مۋزەيىنىڭ ەكسپوزيسياسى ۇسىنىلدى. كورمەگە نۇرعيسا تىلەندييەۆتىڭ فوتوسۋرەتتەرى، ماراپاتتارى، «بولماسىن سوعىس، بولماسىن!» تۋىندىسىنىڭ نوتاسى، جەكە دومبىراسى جانە باسقا دا قۇندى دۇنيەلەرى قويىلدى.
قازاقتىڭ كورنەكتى كومپوزيتورىنىڭ 100 جىلدىعىنا ارنالعان ءىس-شارالار جىل بويى اتاپ وتىلەدى.