2022 جىلى ءبىرقاتار جاڭا ءوندىرىس اشىلادى.
بۇگىن ۇكىمەت وتىرىسىندا ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ قۇرىلىس سالاسىندا كەلەسى جىلى اشىلاتىن جاڭا وندىرىستەر تۋرالى ايتتى، دەپ حابارلايدى Almaty-akshamy.kz ۇكىمەتتىڭ رەسمي سايتىنا سىلتەمە جاساپ.
ولاردىڭ ىشىندە مىنالاردى اتاپ وتۋگە بولادى:
- «Orient Ceramic» جاۋاپكەرشىلىگى شەكتەۋلى سەرىكتەستىگىنىڭ ءىرى كولەمدى كەراميكا پليتكالاردى ءوندىرۋ زاۋىتى. قۋاتتىلىعى 3 ملن شارشى مەتر (ينۆەستيسيا كولەمى - 7 ملرد تەڭگە، 250 جۇمىس ورنى)؛
- «Bolashak Electric» جاۋاپكەرشىلىگى شەكتەۋلى سەرىكتەستىگىنىڭ جابىق ۆاكۋۋمدى اجىراتقىشتار مەن ميكرو-پروسەسسورلىق جۇيەلەردى ءوندىرۋ زاۋىتى (ينۆەستيسيا كولەمى – 3 ملرد تەڭگە، 100 جۇمىس ورنى)؛
- «Valtherm» جاۋاپكەرشىلىگى شەكتەۋلى سەرىكتەستىگىنىڭ رادياتورلار ءوندىرۋ زاۋىتى (ينۆەستيسيا كولەمى – 3،6 ملرد. تەڭگە، 100 جۇمىس ورنى)؛
- «SG Brick» جاۋاپكەرشىلىگى شەكتەۋلى سەرىكتەستىگىنىڭ ەلىمىزدەگى ەڭ ءىرى كىرپىش زاۋىتى. قۋاتتىلىعى جىلىنا 100 ملن كىرپىش (ينۆەستيسيالار كولەمى –11،2 ملرد تەڭگە، 50 جۇمىس ورنى).
«ىشكى نارىقتى وتاندىق ءوندىرىستىڭ نەعۇرلىم سۇرانىسقا يە قۇرىلىس تاۋارلارىمەن (سانفايانس، لاميناتتالعان جابىن، شىنى ماقتا، قىش تاقتايشا، بولمەارالىق ەسىك، جىلۋ وقشاۋلاعىش ماتەريالدار) قامتاماسىز ەتۋ جۇمىستارى جالعاسادى. «Samruk-Kazyna Construction» اكسيونەرلىك قوعامىمەن بىرلەسىپ جالپى سوماسى 601،3 ملرد تەڭگەگە 35 يمپورتتى الماستىراتىن جوبانى ىسكە اسىرىپ، 8 616 جاڭا جۇمىس ورنىن اشۋ جوسپارلانۋدا»، - دەدى ب. اتامقۇلوۆ.
ونىڭ ايتۋىنشا، سانفايانس، كەراميكا پليتكا، مينەرالدىق جىلىتقىش، اعاش-جوڭقا تاقتاسى سياقتى وتاندىق قۇرىلىس تاۋارلارىمەن قامتاماسىز ەتۋ بويىنشا جاڭا وندىرىستەردى اشۋ كوزدەلىپ وتىر.
«بۇل جوبالاردى ىسكە قوسۋ ىشكى نارىقتاعى يمپورت ۇلەسىن شامامەن 60 پايىزعا تومەندەتەدى جانە قۇرىلىس ماتەريالدارى باعاسىنىڭ اۋىتقۋىن بولدىرمايدى. جاڭا جوبالاردى ىسكە قوسۋ 2025 جىلعا قاراي ءونىمنىڭ 10-نان استام ءتۇرى بويىنشا ورتاشا جىلدىق قاجەتتىلىكتى 700 ملن اقش دوللارى كولەمىندە وتەۋگە مۇمكىندىك بەرەدى. تاۋار پوزيسيالارى بويىنشا – تەمىر بەتون بۇيىمدارى، بەتون، قۇرعاق قوسپا، لاك بوياۋ، كىرپىش، شىنى، كابەل، اعاش-جوڭقا تاقتالارى جانە قاسبەتتىك تاقتالار بويىنشا ىشكى نارىق سۇرانىسىن 100% جابۋ جوسپارلانۋدا»، - دەدى ۆەدومستۆو باسشىسى.
سونىمەن قاتار، ىشكى نارىقتىڭ 50% استامى يمپورتقا تاۋەلدى قۇرىلىس ماتەريالدارى - اليۋمينيي رادياتور، پوليەتيلەن قۇبىر، شاتىر ماتەريالدارى، رادياتور، مەتالل جابىندار، ەسىك بلوكتارى، كەراميكا پليتكا، سانفايانس جانە ارماتۋرا بويىنشا سۇرانىستى جابۋ جوسپارلانىپ وتىر.