ادام باسىنا ەكى نەسيەگە دەيىن جەتكەن
ءبىراق قارىز كولەمى 550 مىڭ تەڭگەگە دەيىن قىسقارعان. زەرتتەۋدى IDF Eurasia جۇرگىزگەن. زەرتتەۋگە سايكەس، بيىل توعىز ايدا جەكە تۇلعالارعا بەرىلگەن ميكرونەسيە 44%-كە ءوستى. دەگەنمەن، مۇنداعى قارىزداردىڭ ماقساتى وزگەرمەگەن. مىسالى، قىمبات تەلەفوندار، نوۋتبۋكتار مەن پلانشەتتەردى نەسيەگە الاتىندار ازايعان. ولار جالپى قارىز الۋشىلاردىڭ 57%-نە جەتەدى، دەپ حابارلايدى Almaty-akshamy.kz 24.kz-كە سىلتەمە جاساپ.
قازاقستاندىقتاردىڭ 24%ء-ى ءۇي جوندەۋ ءۇشىن نەسيە راسىمدەسە، قالعان 19% ميكرونەسيە الۋدان باس تارتقان. بۇل 18 بەن 25 جاس ارالىعىنداعى جاستارعا قاتىستى اقپارات. ال 25 پەن 45 جاس ارالىعىنداعىلاردىڭ باسىم بولىگى يپوتەكا راسىمدەپ، كولىك الۋ ءۇشىن نەسيە العان. بۇل جاستان اسقان ازاماتتار بالالارىن وقىتۋعا نەمەسە تۇرمىستىق تەحنيكا الۋعا ميكرونەسيە راسىمدەگەن.
ساۋالناما جۇرگىزگەن ماماندار الداعى جىلى دا بۇل تەندەنسيا ساقتالادى دەپ وتىر. ەلىمىزدە ءبىلىم سالاسىنا قۇيىلاتىن ينۆەستيسيا ازايعان. بيىل توعىز ايدا بۇل باعىت وتكەن جىلمەن سالىستىرعاندا 16%-كە از اقشا ەنشىلەدى.
Energyprom.kz حابارلاۋىنشا، ءبىلىم سالاسىنداعى ينۆەستيسيانىڭ جارتىسىنان كوبى 4 وڭىرگە تيەسەلى. بۇل الماتى، تۇركىستان وبلىسى، شىمكەنت جانە نۇر-سۇلتان قالالارى. ال ەڭ از قارجى قۇيىلعان ايماقتار باتىس قازاقستان وبلىسى، اقتوبە، ماڭعىستاۋ جانە اتىراۋ وبلىسى.
ەلورداعا كەلەتىن تۋريست كوبەيگەن
«AstanaInvest» قالالىق ينۆەستيسيالاردى دامىتۋ ورتالىعىنىڭ حابارلاۋىنشا، وتكەن جىلمەن سالىستىرعاندا بيىل توعىز ايدا كەلگەن تۋريست سانى شامامەن 88% كوپ. وسى ارالىقتا باس قالاعا جارتى ميلليوننان استام تۋريست كەلگەن. ولاردىڭ ون پروسەنتتەن استامى شەتەلدىكتەر. سونداي-اق شاھاردا تىركەلگەن اۋە جولاۋشىلارىنىڭ سانى 61%-كە وسكەن. بۇل كوۆيدكە قارسى ۆاكسينالاۋدىڭ قارقىن الىپ، پاندەميامەن بەلسەندى كۇرەس ناتيجەسىندە تىركەلدى دەيدى ماماندار.
«قازاقستاندى مونەتالار ارقىلى زەرتتە!». ۇلتتىق بانك وسىنداي اتاۋمەن جاڭا كوللەكسيالىق مونەتالار شىعارادى. وندا ەلىمىزدىڭ مادەنيەت پەن سپورت سالالارىنداعى جەتىستىكتەرى بەينەلەنەدى. سونداي-اق «جاراتىلىس سىرلارىندا» دەگەن جاڭا سەريا جاسالادى. وندا تاڭىرشىلدىك، ءۇندى، جۇڭگو، مىسىر وركەنيەتتەرى سالىنادى. مونەتانىڭ تانتالدان جاسالعان جاعىندا كونە وركەنيەتتىڭ ەلەمەنتتەرى، ال، كۇمىستەن قۇيىلعان جاعىندا قازىرگى زاماننىڭ كورىنىستەرى بەينەلەنەدى. ەڭ ءبىرىنشى بولىپ «تاڭىرلىك تانىم» مەن «ۇندىلىك تانىم» اتتى مونەتالار شىعادى. بۇدان بولەك كەلەر جىلى «ساقتار ءستيلى» اتتى جاڭا 100 تەڭگەلىك مونەتالاردىڭ 5 ءتۇرى 5 ملن دانامەن اينالىمعا تۇسەدى. الداعى ەكى جىلدا قازاقتىڭ حالىق ەرتەگىلەرى مەن ۇلتتىق ويىندارى بەينەلەنگەن مونەتالار دا شىعارىلادى دەپ جوسپارلانعان.
الەمدىك ءجىو $100 ترلن جەتۋى مۇمكىن
2022 جىلى الەمدىك جالپى ىشكى ءونىم كولەمى 100 تريلليون دوللارعا دەيىن جەتۋى مۇمكىن.
Centre for Economics and Business Research ساراپشىلارى وسىلاي دەيدى. مامانداردىڭ ايتۋىنشا، بۇل پاندەميادان كەيىنگى جاعدايدىڭ قالپىنا كەلۋىمەن بايلانىستى بولادى. ءبىراق قىمباتشىلىق ساقتالسا، ارينە، الەم ەلدەرىنە ەكونوميكانى رەسەسسياعا اكەلۋ قيىنداي تۇسەدى. سوندىقتان بۇل تەك ساراپشىلار بولجامى عانا. ايتا كەتەيىك، ءقازىر الەمدىك جالپى ىشكى ءونىم 94 تريلليون دوللار. ونىڭ 42%-ى قىتايدىڭ ەنشىسىندە.