ەلىمىزدە جاڭا الەم رەكوردى تىركەلدى

ەڭ كوپۇلتتى وركەستر قۇرامىندا 51 ەلدەن 75 ۇلتتىڭ وكىلى بولدى، دەپ حابارلايدى Almaty-akshamy.kz.

شارا ەلوردادا وتەتىن الەمدىك ءدىن كوشباسشىلارىنىڭ سەزى قارساڭىندا ۇيىمداستىرىلدى. وتكەن ورنى – بەيبىتشىلىك جانە كەلىسىم سارايى. رەكوردتىڭ ءمانى - ءبىر ساحنادا ەڭ كوپۇلتتى مۋزىكا ۇجىمىنىڭ باسىن قوسۋ.

«بەيبىتشىلىك سازى» اتتى جوباعا 51 ەلدەن 75 ۇلت وكىلى قاتىستى. ال رەكوردتى گيننەستىڭ الەمدىك رەكوردتار كىتابىنىڭ تورەشىسى Jack Brockbank ارنايى كەلىپ، تىركەدى.

«جوبانى قولعا العان سوڭ ناتيجە شىعارۋعا تىرىساسىڭ. ايتپەسە باستاماي-اق قويۋ كەرەك. ارينە، «بەيبىتشىلىك سازى» فيزيكالىق تۇرعىدا دا، مورالدىق تۇرعىدا دا شىعىندى قاجەت ەتتى. ءبىراق بىزگە تىلسىمنان كومەك جەتكەندەي اسەردە بولدىق. جاستاردىڭ ومىرگە دەگەن بەلسەندى كوزقاراسى قۋانتتى. كاستينگكە 500-دەن استام ءوتىنىش تۇسكەن بولاتىن. وركەستردىڭ ەڭ جاس مۇشەسى گۋلياف 11-دە عانا. ۇلتى – ماريي.

وسى جوباعا تيتتەي دە بولسىن ۇلەسىن قوسقان ءار ادامعا العىس ايتامىن. ادام بالاسىنىڭ ومىردەگى ماڭىزدى ميسسيالارىنىڭ ءبىرى قايىرىمدىلىق جاساۋ دەپ بىلەمىن. جوباعا قاتىسقان ءار ادام بۇگىن سول ميسسياسىن ورىنداعانداي»، - دەيدى جوبانى ۇيىمداستىرعان ءداۋىت شايحيسلاموۆ.

كوپۇلتتى وركەستر كونە قازاق ءانى دەلىنەتىن "قارا جورعانى" شىرقادى. ابايدىڭ «جەلسىز تۇندە جارىق ايى» مەن ا. ءبوروديننىڭ «يگور كنياز» وپەراسىنان ۇزىندىلەر ورىندالدى. G. Cacciniء-دىڭ «Ave Maria»، Vangelisء-تىڭ «Conquest of paradise» شىعارمالارى دا وركەستردىڭ سازىنا ارقاۋ بولدى.

گرۋزيادان كەلگەن Geo Folk Tour ۇجىمى ابايدىڭ «كوزىمنىڭ قاراسى» ءانىن ورىنداسا، ديانا ماكينا ۋكراين ۇلتىنىڭ «يا ليۋبليۋ تىلكي تەبە» ءانىن ناقىشىنا كەلتىرىپ شىرقادى. «تۋعان جەر» بالالار حورى M. Jackson-نىڭ We Are The World ءانىن تارتۋ ەتتى.

الەمنىڭ 100-دەن استام ەلىندە 20-دان استام تىلدە شىعاتىن گيننەستىڭ رەكوردتار كىتابىنا بيىلعى اقپان ايىندا قازاقستاندىقتاردىڭ باستاماسىمەن تاعى ءبىر رەكورد تىركەلگەن بولاتىن. World Painting جوباسىنا الەمنىڭ تۇكپىر-تۇكپىرىنەن قاتىسقان ادامدار قىلقالامنىڭ قاعازداعى ءىزىن ۇزبەستەن كۇردەلى تۋىندى سالىپ شىقتى. اتالعان جوبا دا DPARTNERS كومپانياسىنىڭ باستاماسىمەن ىسكە اسقان بولاتىن.