ەلدە ينتەرنەت الاياقتىعى بويىنشا قىلمىس دەرەگى كۇرت وسكەن.
2018 جىلى 4 مىڭ قىلمىس تىركەلسە، بيىلدىڭ 9 ايىندا 15 مىڭعا دەيىن جەتىپ وتىر. بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە ىشكى ىستەر ءمينيسترى مارات احمەتجانوۆ ايتتى. سالدارىنان جىل سايىن 10 ميلليارد تەڭگە زالال كەلەدى، دەپ حابارلايدى Almaty-akshamy.kz.
بۇل ازداي قۇقىق بۇزۋشىلىقتار سانى بىلتىرمەن سالىستىرعاندا 2%-عا وسكەن. جىل باستالعالى 122 مىڭعا جۋىق قىلمىستىق قۇقىق بۇزۋشىلىق تىركەلىپتى. سونداي-اق وتكەن 9 ايدىڭ ىشىندە 6 ميلليون اكىمشىلىك قۇقىقبۇزۋشىلىق انىقتالعان. ونىڭ 4،8 ملن-نان استامى – جول ەرەجەسىن بۇزۋ. ونىڭ ىشىندە 17،5 مىڭ جۇرگىزۋشى كولىكتى ماس كۇيىندە تىزگىندەگەن. جالپى 20 مىڭ جۇرگىزۋشى باسقارۋ قۇقىعىنان ايىرىلسا، 16 مىڭ ادام اكىمشىلىك قاماۋعا الىنعان. بۇدان بولەك، استىرتىن جۇمىس ىستەپ كەلگەن ەكى ماينينگ فەرماسى انىقتالدى.
«الماتى وبلىسىندا ەكى ماينينگ فەرماسىن قۇرعان، بۇرىن سوتتى بولعان قىلمىسكەرلەر توبى اشكەرەلەندى. جالپى 20 ادام ۇستالدى. قۇنى 7 ميلليون اقش دوللارىن قۇرايتىن جابدىقتار، قارۋ-جاراقتار تاركىلەندى. ولاردىڭ اي سايىنعى زاڭسىز تابىسى – 500 مىڭ دوللار»، - دەيدى ق ر ىشكى ىستەر ءمينيسترى مارات احمەتجانوۆ.