ەلىمىزدە حالىقارالىق مەندەلەيەۆ وليمپياداسى وتەدى

ءبىلىم سايىسىنا 20-دان استام ەلدىڭ كومانداسى قاتىسادى.

وليمپيادانى ۇيىمداستىرۋشىلار جارىس وتەتىن زەرتحانالار مەن اۋديتوريالاردىڭ تەحنيكالىق جابدىقتالۋىن جوعارى باعالادى، دەپ حابارلايدى Almaty-akshamy.kz

1-6 مامىر ارالىعىندا قازاقستاندا وقۋشىلار اراسىنداعى حيميا پانىنەن 57ء-شى حالىقارالىق مەندەلەيەۆ وليمپياداسى وتەدى.

"رەسپۋبليكا ۇكىمەتى مەن ءبىلىم جانە عىلىم مينيسترلىگىنىڭ جان-جاقتى قولداۋىمەن مەندەلەيەۆ وليمپياداسى 2002، 2012 جانە 2017 جىلدارى قازاقستاندا ءوتتى. بۇل حالىقارالىق اۋقىمداعى جارىستى جوعارى دەڭگەيدە وتكىزۋ مۇمكىندىگىن دالەلدەيدى. بيىلعى جىلى حالىقارالىق مەندەلەيەۆ وليمپياداسىنىڭ نەگىزگى ءىس-شارالارى استانادا، نازاربايەۆ ۋنيۆەرسيتەتىنىڭ زەرتحانالارى مەن اۋديتوريالارىندا وتەدى. ۋنيۆەرسيتەتتىڭ تەحنيكالىق جابدىقتالۋى وليمپيادانى وتكىزۋگە بارلىق جاعىنان تولىق سايكەس كەلەدى"، - دەدى قازاقستان رەسپۋبليكاسى وقۋ-اعارتۋ مينيسترلىگىنىڭ "دارىن" رەسپۋبليكالىق عىلىمي-تاجىريبەلىك ورتالىعىنىڭ ديرەكتورى عاجدەمبەك تۇرسىنوۆ.

مەندەلەيەۆ وليمپياداسىنا قاتىساتىنىن ءقازىردىڭ وزىندە 20-دان استام ەلدىڭ كومانداسى راستادى. ءداستۇرلى تۇردە اۆستريا، ءازىربايجان، ارمەنيا، بەلارۋس، بولگاريا، ۆەنگريا، يزرايل، قازاقستان، قىرعىزستان، ماكەدونيا، موڭعوليا، بىرىككەن اراب امىرلىكتەرى، رەسەي، ساۋد ارابياسى، سيريا، تاجىكستان، تۇركىمەنستان، تۇركيا، وزبەكستان، حورۆاتيا جانە تاعى باسقا ەلدىڭ كوماندالارى قاتىسادى. برازيليا قۇراماسى تۋرنيرگە قاتىسۋعا العاش رەت ءوتىنىم بەردى.

وليمپيادانى ۇيىمداستىرۋ كوميتەتىنىڭ ءتوراعاسى، رەسەي عىلىم اكادەمياسىنىڭ ۆيسە-پرەزيدەنتى جانە ماسكەۋ مەملەكەتتىك ۋنيۆەرسيتەتىنىڭ حيميا فاكۋلتەتىنىڭ عىلىمي جەتەكشىسى ستەپان كالمىكوۆ 2023 جىلعى وليمپيادا بارلىق كوۆيد شەكتەۋلەرى جويىلعاننان كەيىن بەتپە-بەت فورماتتا ەكىنشى رەت وتكىزىلىپ وتىرعانىن ايتتى.

"بيىل ەلدەردىڭ قاتىسۋعا جولداعان وتىنىمدەرىنىڭ سانى بىردەن 30%-كە ءوستى. ءبىز عىلىم مەن تەحنولوگيا ونجىلدىعى ماقساتتارىنا قول جەتكىزۋگە ءوز ۇلەسىمىزدى قوسا وتىرىپ، قاتىسۋشى مەملەكەتتەر سانى ودان ءارى كەڭەيەدى دەپ كۇتەمىز"، - دەدى ول.

جارىس ادەتتە بەس-التى كۇنگە سوزىلادى جانە ءۇش كەزەڭنەن، اتاپ ايتقاندا، ەكى تەوريالىق جانە ءبىر پراكتيكالىق كەزەڭنەن تۇرادى.

حالىقارالىق مەندەلەيەۆ وليمپياداسى-57 ءىس-شاراسىنىڭ اشىلۋ جانە جابىلۋ سالتاناتى وليمپيادانىڭ رەسمي پاراقشالارىندا تىكەلەي ەفيردە كورسەتىلەدى.