ءقازىر «زاڭسىز كەلۋشى» وپەراسياسى ءوتىپ جاتىر.
شىمكەنت قالاسىندا حالىقارالىق ىزدەۋدە بولعان وزبەكستان ازاماتى ۇستالدى، دەپ حابارلايدى Almaty-akshamy.kz
پوليسيا تۇتقىنداعان شەتەل ازاماتىن كورشى مەملەكەتكە ەكستراديسيالاۋ جۇرگىزىلۋدە.
«زاڭسىز كەلۋشى» وپەراسياسى 19-ماۋسىمنان بەرى جۇرگىزىلىپ جاتىر. وپەراسيا ەلىمىزگە كوشى-قون زاڭناماسىن اينالىپ كەلگەن شەتەل ازاماتتارىن انىقتاپ، ولاردى ەكستراديسيالاۋعا ارنالعان.
وپەراسيا كەزىندە شىمكەنت قالاسى پد كوشى-قون قىزمەتى باسقارماسىنىڭ قىزمەتكەرلەرى 4 شەتەلدىك ازاماتتى ۇستاپ، ولار ەلىمىزدەن شىعارىلدى.
«زاڭسىز كەلۋشى» ءىس-شاراسى اياسىندا پوليسەيلەر قالاداعى قۇرىلىس وبەكتىلەرىن، كوممۋنالدىق ۇيلەردى، بازارلاردى، جاتاقحانالار مەن كوپشىلىك جينالاتىن ورىنداردى تەكسەرىپ جاتىر.
وسى رەتتە شىمكەنتتىك پوليسەيلەر جەرگىلىكتى ازاماتتارعا دا ەسكەرتۋ جاساپ وتىر. ياعني، ولار دەر كەزىندە شەتەلدىكتەردى ۋاقتىلى تىركەمەي، زاڭسىز جۇمىس ىستەتىپ قويسا ق ر اقبتك-نىڭ 518 جانە 519-باپتارىنا سايكەس اكىمشىلىك جاۋاپكەرشىلىككە تارتىلادى.