ەسىرتكى ناسيحاتتاۋشىلارى جازاعا تارتىلادى.
ق ر ءىىم ەسىرتكى قىلمىسىنا قارسى ءىس-قيمىل دەپارتامەنتى باسقارما باستىعى باقىتجان ءامىرحانوۆ ەلىمىزدە ەسىرتكىنى ءتۇرلى ادىستەرمەن ناسيحاتتايتىنداردىڭ جاۋاپقا تارتىلاتىنىن ايتتى. ولاردىڭ ىشىندە رەپەرلەر، گرافيتي سۋرەتشىلەرى، ءتۇرلى سايتتار كىرەتىنى اتاپ ءوتىلدى، دەپ حابارلايدى Almaty-akshamy.kz Elorda.info-عاسىلتەمە جاساپ.
باسقارما باستىعى ەلىمىزدە جاسوسپىرىمدەر مەن جاستاردىڭ، اسىرەسە، رەپەرلەر مەن انشىلەرگە ەلىكتەۋشىلىكتەرىنىڭ باسىم ەكەنىن جەتكىزدى.
«جاستار بۇگىندە رەپ ايتاتىن ءتۇرلى توپتارعا ەلىكتەيدى. مىسالى، ءبىز وسىعان دەيىن Mad Men توبىن وسى ەسىرتكى قىلمىسى بويىنشا ۇستاعان بولاتىنبىز. ولار ءوز كەزەگىندە جاستار اراسىندا وتە تانىمال توپ. ءبىز مۇنداي وقيعالاردان سوڭ بارىنە مۇقيات نازار اۋداراتىن بولدىق. ماسەلەن، ءقازىر رەپ ايتىپ جۇرگەندەردىڭ اندەرىنىڭ ماتىندەرىندە ماريحۋانا تاعى دا باسقا ەسىرتكىلەر تۋرالى سوزدەر قوسىلىپ ءجۇر. بۇنىڭ ءوزى ەسىرتكىنى ناسيحاتتاۋ بولىپ سانالادى. بۇرىن بۇنداي ارەكەتتەرگە تەك اكىمشىلىك جازا قولدانىلسا، بۇگىنگى تاڭدا قىلمىستىق كودەكستىڭ 299-1 بابى بويىنشا 3 جىلدان 6 جىلعا دەيىن باس بوستاندىعىنان ايىرۋ جازاسى كوزدەلگەن»، – دەدى ءامىرحانوۆ.
باسقارما باستىعىنىڭ مالىمەتىنشە، وسى باپ بويىنشا بۇگىنگى تاڭدا 79 ءىس تىركەلگەن. ول بۇل ىستەرگە جازا قولدانباس بۇرىن ناقتى دالەلدەر مەن ارنايى ساراپتاما جۇرگىزىلەتىنىن قوسا كەتتى.
«ول ءۇشىن دە ارنايى ساراپتامالار جۇرگىزىلەدى. ماريحۋانا ەسىرتكى دەپ ايتىلسا، ونى ناقتى جاۋاپقا تارتا المايمىز عوي. ءبىز جەلىلەردەن ءوزىمىزدىڭ ارنايى ماماندارىمىز ارقىلى باقىلاۋ جۇمىستارىن جۇرگىزە وتىرىپ، مۇقيات قارايمىز. ماتىنىندە ەسىرتكى تۋرالى ءبىر ءسوز بار ەكەن دەپ ءبارىن جاۋاپقا تارتا المايمىز. ايتىپ كەتكەنىمدەي، ونى ناسيحاتتاۋشىلاردى تەرگەپ، ءان بولسا ءانىن، بەلگىلى ءبىر كيىم مەن سۋرەتتەر بولسا، ونى سوت ساراپتاماسىنان وتكىزىپ بارىپ جاۋاپقا الامىز. بۇل جەردە اكىمشىلىك تە، قىلمىستىق تا كودەكس قاراستىرىلادى.
الماتىدا جاقىندا رەپ جازعان وسىنداي ءبىر توپ ءماتىنىن ساراپتامادان وتكىزىپ، 296-باپ بويىنشا تىركەدىك. ءقازىر تەرگەۋ، تەكسەرۋ امالدارى ءجۇرىپ جاتىر. ءبىز مۇنداي ماتىندەرگە بىردەن كوڭىل بولەمىز»، – دەپ قوستى ءامىرحانوۆ.