بۇل تۋرالى ق ر ەڭبەك جانە حالىقتى الەۋمەتتىك قورعاۋ ءبىرىنشى ۆيسە-مينيسترى ءاقمادي سارباسوۆ ق ر پرەزيدەنتى جانىنداعى ورتالىق كوممۋنيكاسيالار قىزمەتىندە وتكەن بريفينگتە حابارلادى.
ۆيسە-مينيستردىڭ ايتۋىنشا، قازاقستاندا ەڭبەك كۇنى مەرەكەسى 2013 جىلدان باستاپ جىل سايىن قىركۇيەكتىڭ سوڭعى جەكسەنبىسىندە اتاپ وتىلەدى، دەپ حابارلايدى Almaty-akshamy.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
«بيىل بۇل ايتۋلى كۇن 24 قىركۇيەككە تۇسپا تۇس كەلىپ وتىر. ەڭبەك كۇنى – بۇل كۇنتىزبەدەگى ناعىز ەڭبەك مەرەكەسى عانا ەمەس، سونىمەن قاتار جۇمىس ءومىرىنىڭ ساپالىق كورسەتكىشى. ەڭبەك ءومىرىنىڭ ساپاسى دەگەنىمىز بۇل تۇراقتى جۇمىسپەن قامتۋ، ءقاۋىپسىز جۇمىس ورتاسى، ەڭبەكاقىنىڭ لايىقتى دەڭگەيى، الەۋمەتتىك كەپىلدىكتەر»، – دەدى ءاقمادي سارباسوۆ.
ول سونداي-اق الەمنىڭ 100-دەن استام مەملەكەتى ەڭبەك كۇنىن اتاپ وتەتىنىن جانە جاڭا زەلانديا، جاپونيا، جۇڭگو، رەسەي، بەلارۋس سياقتى ءبىرقاتار ەلدەردە بۇل مەرەكە مەملەكەتتىك مارتەبەگە يە ەكەنىن اتاپ ءوتتى.
سونداي-اق، ءبىرىنشى ۆيسە-مينيستر مەرەكە قارساڭىندا ەڭبەك قۇندىلىقتارىن ىلگەرىلەتۋ ماقساتىندا مىناداي ءىس-شارالار وتكىزىلەتىنىن ايتتى:
- ەڭبەك ادامدارى مەن ءتۇرلى كاسىپ وكىلدەرى تۋرالى دەرەكتى فيلمدەر، تاقىرىپتىق باعدارلامالار، ايدارلار، حابارلار سەرياسىن كورسەتۋ؛
- الەۋمەتتىك جەلىلەردە كەڭىنەن تاراتۋ ءۇشىن «ەڭبەك ادامىن» (جۇمىسشى كاسىپتەرىنىڭ ادامدارى جانە ت. ب.) تانىمال ەتۋ جانە ىلگەرىلەتۋ جونىندەگى اقپاراتتىق ماتەريالدار، روليكتەر، سيۋجەتتەر شىعارۋ؛
- بارلىق وڭىرلەردى تىكەلەي قوسۋ ارقىلى «ادال ازامات – ادال ەڭبەك» تەلەمارافونىن وتكىزۋ؛
- بارلىق ءبىلىم بەرۋ ۇيىمدارىندا «مەنىڭ جەتىستىگىم – مەنىڭ ناتيجەم» تاقىرىبىندا ونلاين دارىستەر، سىنىپ ساعاتتارىن، ستۋدەنتتىك پىكىرتالاستار وتكىزۋ؛
- «ەڭبەك گالەرەياسى» فوتوكورمەلەرىنىڭ سەريالارىن، سونىڭ ىشىندە كورنەكى جارناما قۇرالدارىن جانە ت. ب. پايدالانا وتىرىپ ىسكە قوسۋ؛
- ەڭبەك كۇنىنە وراي «مەنىڭ جەتىستىگىم – مەنىڭ ناتيجەم» ۇرانىمەن سپورتتىق فەستيۆالدار وتكىزۋ جانە ت. ب.
«ەڭبەك كۇنىن مەرەكەلەۋ اياسىندا ءبىز جىل سايىن «ەڭبەك جولى» رەسپۋبليكالىق كونكۋرسىن وتكىزەمىز، ول ناتيجەلى ەڭبەكتى ىنتالاندىرۋعا، جاستار اراسىندا جۇمىسشى ماماندىقتارىن ناسيحاتتاۋعا جانە جۇمىسشى اۋلەتتەردىڭ كوپجىلدىق داستۇرلەرىن نىعايتۋعا باعىتتالعان»، – دەپ تولىقتىردى ءسوزىن ءاقمادي سارباسوۆ.
كونكۋرس جىل سايىن ءۇش نوميناسيا بويىنشا وڭىرلىك جانە رەسپۋبليكالىق دەڭگەيدە ەكى كەزەڭنەن وتەدى: «ۇزدىك ەڭبەك اۋلەتى» – ەڭبەك ءوتىلى ەڭ ۇزاق، ماراپاتى ەڭ كوپ اۋلەت؛ «جۇمىس ىستەيتىن جاستاردىڭ ۇزدىك تالىمگەرى» – جۇمىس ءوتىلى كەمىندە 20 جىل، جوعارى ءتيىمدى جۇمىس ىستەيتىن تالىمگەر؛ «ءوندىرىس ۇزدىك جاس مامانى» – جۇمىس ءوتىلى 5 جىلدان اسپايتىن ءوندىرىستىڭ ەڭ بەلسەندى جانە ەڭبەكقور قىزمەتكەرى تاڭدالادى.
«بيىل جەرگىلىكتى اتقارۋشى ورگاندار كونكۋرسقا قاتىسۋ ءۇشىن 591 ءوتىنىش قابىلدادى. «ۇزدىك ەڭبەك اۋلەتى» نوميناسياسى بويىنشا – 143 ءوتىنىش، «جۇمىس ىستەيتىن جاستاردىڭ ۇزدىك تالىمگەرى» نوميناسياسى بويىنشا – 215 ءوتىنىش، «ءوندىرىستىڭ ۇزدىك جاس مامانى» نوميناسياسى بويىنشا – 233 ءوتىنىش قابىلداندى»، – دەدى ءاقمادي سارباسوۆ.
ول سونداي-اق كونكۋرستىڭ وڭىرلىك كەزەڭىنىڭ جەڭىمپازدارىن وبلىستار مەن رەسپۋبليكالىق ماڭىزى بار قالالار اكىمدەرىنىڭ ورىنباسارلارىنىڭ توراعالىعىمەن كوميسسيالار ايقىندايتىنىن جانە سالتاناتتى تۇردە ماراپاتتالاتىنىن اتاپ ءوتتى. ءبىرىنشى ورىن يەگەرلەرى كونكۋرستىڭ رەسپۋبليكالىق كەزەڭىنە قاتىسۋ مۇمكىندىگىنە يە بولادى.
«كونكۋرستىڭ رەسپۋبليكالىق كەزەڭىنىڭ جەڭىمپازدارىن ەڭبەك مينيسترلىگى جانىنداعى كوميسسيا ايقىندايتىن بولادى. كوميسسيا قۇرامىنا ق ر پارلامەنتىنىڭ دەپۋتاتتارى، ق ر ەحاقم، «اتامەكەن» ۇكپ، «قوعامدىق كەلىسىم» رمم جانە الەۋمەتتىك ارىپتەستەر وكىلدەرى كىرەدى»، – دەپ حابارلادى ۆيسە-مينيستر.
«ەڭبەك جولى» بايقاۋىنىڭ لاۋرەاتتارى 2023 جىلعى 22 قىركۇيەكتە Hilton Astana قوناق ۇيىندە ەڭبەك كۇنىنە ارنالعان فورۋم اياسىندا وتەتىن سالتاناتتى راسىمدە جاريالانادى. جەڭىمپازدارعا اقشالاي سەرتيفيكاتتار مەن ەستەلىك سىيلىقتار تابىس ەتىلەدى.