ەلىمىزدە ەلەكتر قۋاتىن تۇتىنۋ كولەمى ارتتى. رەسمي مالىمەتتەرگە سۇيەنسەك، بيىل ەنەرگيا تۇتىنۋ جىلداعىدان 7،2% پايىزعا وسكەن، دەپ حابارلايدى almaty-akshamy.kz
ءوسىم، اسىرەسە، وڭتۇستىك وڭىرلەردە بايقالادى. جالپى، قازاقستاندىقتار بىلتىرمەن سالىستىرعاندا مىڭ جارىم مەگاۆاتقا ارتىق ەلەكتر قۋاتىن پايدالانعان. وتاندىق ەنەرگەتيكتەر الداعى قىس ايلارىندا تاپشىلىق سەزىلەدى دەيدى. شامامەن 1 ملرد 7 ملن كيلوۆاتت قۋات قاجەت بولۋى مۇمكىن.
باستى سەبەپ - ەلەكتر ستانسيالارىنداعى جوندەۋ مەن گيدروەلەكتر ستانسيالارداعى سۋ تاپشىلىعى. ايتا كەتكەن ءجون، ءقازىر كوپتەگەن مەملەكەت ەلەكتر قۋاتىنان تارىعىپ وتىر.
جاڭارتىلاتىن قۋات كوزدەرىنە دەن قويعان ەۋروپانىڭ وزىندە گازدىڭ باعاسى تاريحي ماكسيمۋمدەردەن اسىپ ءتۇستى. قىتايدا ەلەكتر قۋاتى تاپشىلىعىنان زاۋىتتار مەن فابريكالار جابىلدى.
ال قىرعىزستاندا توقتوعۇل گيدروەلەكتر ستانسياسىندا سۋدىڭ ازايۋىنان ەلەكتر قۋاتىن جوسپارعا ساي جاپپاي ءوشىرۋ جونىندە حالىققا ەسكەرتىلىپ جاتىر.