ەلىمىزدە ەكپە الۋ كەستەگە سايكەس جۇرگىزىلىپ جاتىر

بۇگىندە وڭىرلەرگە شامامەن 6،2 ملن ۆاكسينا دوزاسى جەتكىزىلگەن.

قازاقستاندا ۆاكسينا جەتكىزۋ كەستەگە سايكەس جۇرگىزىلىپ جاتىر. بۇل تۋرالى ورتالىق كوممۋنيكاسيالار قىزمەتىندەگى باسپا ءسوز ءماسليحاتى بارىسىندا ق ر دەنساۋلىق ساقتاۋ ءمينيسترى الەكسەي سوي مالىمدەدى، دەپ حابارلايدى Almaty-akshamy.kz.

«قازىرگى ۋاقىتتا قازاقستاندا ۆاكسينا جەتكىزۋ كەستەگە سايكەس جۇرگىزىلىپ جاتقانىن اتاپ ءوتۋ وتە ماڭىزدى. بۇگىندە وڭىرلەرگە شامامەن 6،2 ملن ۆاكسينا دوزاسى جەتكىزىلدى. ءقازىر 2 587 884 ادام 1-كومپونەنتتى الدى. بۇل ەكپە الۋعا جاتاتىن حالىقتىڭ 26 پايىزىن قۇرايدى. ەكىنشى كومپونەنت 1 480 309 ادامعا سالىندى»، - دەدى مينيستر ورتالىق كوممۋنيكاسيالار قىزمەتىندەگى باسپا ءسوز ءماسليحاتى بارىسىندا.

ونىڭ دەرەگىنشە، رەسپۋبليكادا ۆاكسينانىڭ 1 ملن-نان استام ءبىرىنشى جانە 1 ملن-نان استام ەكىنشى كومپونەنت قالدىق دوزاسى بار.

«جەتكىزۋ كەستەسى ناقتى بەكىتىلگەن. ءبىز ۆاكسينانى جارامدىلىق مەرزىمىمەن كەزەڭ-كەزەڭمەن الىپ جاتىرمىز. قازىرگە دەيىن ۇلكەن ۇگىت جۇمىسى جۇرگىزىلدى. وڭىرلەرمەن، مەملەكەتتىك ورگاندارمەن بىرگە ايماقتىق جانە ورتالىق بۇقارالىق اقپارات قۇرالدارىندا 3،5 مىڭنان استام جاريالانىم، 17 مىڭ ماتەريال جارىق كوردى»، - دەدى الەكسەي سوي.