مەملەكەت باسشىسى قاسىم-جومارت توقايەۆ عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا قورشاعان ورتانى قورعاۋدىڭ ماڭىزدىلىعى تۋرالى ايتتى.
سونداي-اق پرەزيدەنت بۇۇ اياسىندا 2026 جىلى قازاقستاندا ايماقتىق كليمات ءسامميتى وتەتىنىن اتاپ ءوتتى، دەپ حابارلايدى Almaty-akshamy.kz.
«جاڭا ايتقانىمداي، كەيىنگى جىلدارى الەمدە تابيعي جانە تەحنوگەندىك اپاتتاردىڭ سانى كۇرت كوبەيدى. ياعني، جاھاندىق يندۋستريالاندىرۋ مەن ۋربانيزاسيا ۇدەرىسى كليماتتىڭ وزگەرۋىنە تىكەلەي اسەر ەتىپ وتىر. كەيبىر بولجامعا قاراساق، بۇل ءۇردىس الداعى بەس جىلدا الەم ەكونوميكاسىنا شامامەن بەس تريلليون دوللار شىعىن اكەلەدى. سوندىقتان قورشاعان ورتانى قورعاۋ – ءبىز ءۇشىن ماڭىزدى ماسەلەنىڭ ءبىرى.
يۋنەسكو شەشىمىمەن 2020 جىلى الماتىدا قۇرىلعان وڭىرلىك گلياسيولوگيالىق ورتالىق كليماتتاعى وزگەرىستەردى زەرتتەۋگە زور ۇلەس قوسىپ كەلەدى. عالىمدارىمىز مۇزدىقتاردىڭ ەرۋىن زەرتتەپ قانا قويماي، سەلدەن جانە مۇزداق كولدەردەن كەلەتىن قاۋىپكە قارسى قورعانىسىمىزدىڭ وسال تۇستارىن كۇشەيتۋ جولدارىن دا ىزدەيدى. گلياسيولوگيالىق ورتالىقتىڭ الەۋەتىن تولىق پايدالانۋ قاجەت. ۇكىمەت ورتالىقتى عيماراتپەن قامتاماسىز ەتۋ مىندەتىن شەشىپ جاتىر. ەندى قازاقستان ۇكىمەتى مەن يۋنەسكو اراسىنداعى گلياسيولوگيالىق ورتالىقتىڭ قىزمەتى تۋرالى كەلىسىمدى ۇزارتۋ ماسەلەسىنە ەرەكشە نازار اۋدارۋ قاجەت. سەبەبى ونىڭ مەرزىمى بيىل اياقتالادى. بۇۇ اياسىندا 2026 جىلى قازاقستاندا ايماقتىق كليمات ءسامميتى وتەدى. بۇل ماڭىزدى ءىس-شارا حالىقارالىق قوعامداستىقتىڭ نازارىن مۇزدىقتاردىڭ ەرۋى، وزەندەر مەن كولدەردىڭ تايازدانۋى، شولەيتتەنۋ، جەردىڭ توزۋى سياقتى پروبلەمالارعا اۋدارۋعا مۇمكىندىك بەرەدى. سامميتكە دايىندىقتى قازىردەن باستاۋ كەرەك. بۇل جيىن وڭىرلىك جانە جاھاندىق ەكولوگيالىق سىن-قاتەرلەرگە توتەپ بەرۋ ءۇشىن عالىمداردىڭ، ساراپشىلاردىڭ، ساياساتكەرلەردىڭ كۇش-جىگەرىن جۇمىلدىرۋعا ىقپال ەتەتىنىنە سەنىمدىمىن»، - دەدى مەملەكەت باسشىسى.