ەلىمىزدە «E-sport» سيفرلىق پلاتفورماسى ىسكە قوسىلادى

بۇل تۋرالى ق ر مادەنيەت جانە سپورت ءمينيسترىنىڭ ورىنباسارى سەرىك جاراسبايەۆ ءمالىم ەتتى

سپورتسۇيەر قاۋىم ءۇشىن جۋىردا «E-sport» سيفرلىق پلاتفورماسى ىسكە قوسىلماق. بۇل تۋرالى ق ر مادەنيەت جانە سپورت ءمينيسترىنىڭ ورىنباسارى سەرىك جاراسبايەۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«E-sport» زاماناۋي سيفرلىق پلاتفورما. ول جەردەن قانداي سپورتتىق سەكسيالار بار، جاتتىقتىرۋشىسى كىم دەگەن سەكىلدى بارلىق اقپاراتتى الۋعا بولادى. بالاسىن سپورتقا بەرگىسى كەلەتىن اتا-انالار ءۇشىن ەركىن تاڭداۋ. سونداي-اق «E-sport» پلاتفورماسىن تۇتىنۋشىلارمەن قاتار، سپورت بويىنشا قىزمەت ۇسىنۋشىلار دا قولدانا الادى. مىسالى، كەز كەلگەن ادام ياندەكس، يندرايۆەر ءموبيلدى جۇيەسىنە تىركەلىپ تاكسي قىزمەتىن ۇسىنا الادى عوي. بۇل جۇيە دە سونداي. سپورتتان جاتتىقتىرۋشى نەمەسە باپكەر ءوز قىزمەتىن ۇسىنادى»، - دەدى سەرىك جاراسبايەۆ تىلشىلەردىڭ سۇراعىنا جاۋاپ بەرە تۇرىپ.

ۆيسە-مينيستردىڭ ايتۋىنشا، سپورت سالاسىنداعى اتالعان جاڭاشىلدىق جۋىردا ىسكە قوسىلادى.

«ءسىز وزىڭىزگە جاقىن سپورت ءتۇرىن تاڭدايسىز، ودان ءارى ءسىز تاڭداعان سپورتقا قاتىستى بارلىق دەرەكتەر شىعادى. ياعني سەكسيانىڭ مەكەن-جايى، جاتتىقتىرۋشىنىڭ ساناتى قانداي تاعى سول سياقتى»، - دەيدى ول.