سوتتالعاندار جاقىندارىمەن جۇزدەسىپ، قۋانىشقا بولەندى
بۇگىن الماتى قالاسى قىلمىستىق-اتقارۋ جۇيەسى دەپارتامەنتىنىڭ لا-155/18 مەكەمەسىندە «اشىق ەسىك كۇنى» وتكىزىلدى، دەپ حابارلايدى Almaty-akshamy.kz.
بۇل كۇنى اتالعان مەكەمەدەگى شارۋاشىلىق قىزمەتى جاساعىنداعى سوتتالعاندار جاقىندارىمەن جۇزدەسىپ، قۋانىشقا بولەندى.
حالىقارالىق ايەلدەر مەرەكەسى قارساڭىندا ۇيىمداستىرىلعان «اشىق ەسىك كۇنى» جازالىلار انالارى مەن اپكەلەرىن، قارىنداستارى مەن اپالارىن ءوز قولدارىمەن جاساعان اشىقحاتتارمەن قارسى الىپ، ولارعا ۇلكەن مەرەكەلىك كوڭىل-كۇي سىيلادى.
جىل باسىندا ەلىمىزدە جاريالانعان توتەنشە جاعدايعا جانە كورونوۆيرۋس ىندەتىنە بايلانىستى باس بوستاندىعىنان ايىرۋ ورىندارىنداعى جازالىلار كوپتەن بەرى جاقىندارىمەن بەتپە-بەت كەزدەسكەن جوق بولاتىن. بۇگىنگى «اشىق ەسىك كۇنى» لا-155/18 مەكەمەسىندەگى بارىس جىلعى العاشقى كەزدەسۋ.
«اتالعان مەكەمەدە ءقازىر 45 شارۋاشىلىق قىزمەتىندەگى سوتتالعان جازالارىن وتەۋدە. شارۋاشىلىق قىزمەت كورسەتۋ جاساعىنا ق ر قىلمىستىق-اتقارۋ كودەكسىنىڭ 92-بابىنا سايكەس جازاسىن قاۋىپسىزدىگى ورتاشا مەكەمەدە وتەيتىن، ۇكىم بويىنشا جازاسى بەس جىلعا دەيىنگى، قىلمىسى ورتا دارەجەدەگى، دەنساۋلىعى ەڭبەككە جارامدى سوتتالعاندار ىرىكتەلەدى»،-دەلىنگەن حابارلامادا.
«اشىق ەسىك كۇنىنە» كەلگەن 32 ادام تەك تەمىر توردا وتىرعان تۋىستارىمەن جۇزدەسىپ قانا قويعان جوق، ولاردىڭ جاتاتىن جانە دەمالاتىن ورىندارىن ارالاپ جانە ءبىر داستارحان باسىندا اس ءىشىپ، مارە-سارە بولدى.