بليس-شاحماتتان الەم چەمپيوناتى ەلىمىزدە العاش رەت وتكىزىلدى.
حالىقارالىق شاحمات فەدەراسياسى (FIDE) الەم چەمپيوناتىنىڭ ۇيىمداستىرىلۋ دەڭگەيىن جوعارى باعالادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل تۋرالى ورتالىق كوممۋنيكاسيالار قىزمەتىندە وتكەن بريفينگىدە قازاقستان شاحمات فەدەراسياسىنىڭ ۆيسە-پرەزيدەنتى دارمەن ءسادۋاقاسوۆ ايتتى.
«بۇل قازاقستان ءۇشىن ەرەكشە وقيعا بولدى. چەمپيونات بۇرىنعىعا قاراعاندا ۇلكەن ماسشتابتا ءوتتى. قازاقستان بۇعان دەيىن ۇلكەن جارىستار، الەم چەمپيوناتتارىن وتكىزگەن. دەگەنمەن، مۇنداي كولەمدەگى تۋرنيرلەردى ءبىز ءالى ۇيىمداستىرماعان ەدىك. ءبىز، بارلىق ۇيىمداستىرۋ كومانداسى، قازاقستان شاحمات فەدەراسياسى جانە حالىقارالىق شاحمات فەدەراسياسىمەن بىرلەسىپ، جوسپارلى ءارى ناتيجەلى جۇمىس اتقاردىق»، - دەدى دارمەن ءسادۋاقاسوۆ.
ونىڭ ايتۋىنشا، حالىقارالىق شاحمات فەدەراسياسى (FIDE) چەمپيوناتتىڭ ۇيىمداستىرىلۋ دەڭگەيىن جوعارى باعالاعان.
«بۇل بىزگە بولاشاقتا بۇدان دا باسقا ءىرى حالىقارالىق جارىستاردى وتكىزۋگە مۇمكىندىك بەرەتىن الاڭ بولدى دەپ زور سەنىممەن ايتا الامىز»، - دەپ تۇيىندەدى شاحمات فەدەراسياسىنىڭ ۆيسە-پرەزيدەنتى.