پرەمەر-مينيستر قازىرگى ۋاقىتتا بيزنەسكە كوپتەگەن فورمالدى تالاپتار قويىلعانىن اتاپ ءوتتى.
ءاليحان سمايىلوۆ كاسىپكەرلىك قىزمەتتە «تازا پاراقتان باستاپ» رەتتەۋدى ەنگىزۋ جانە مەملەكەتتىك باقىلاۋ مەن قاداعالاۋدى اۆتوماتتاندىرۋ ماسەلەلەرى جونىندە كەڭەس وتكىزدى، دەپ حابارلايدى Almaty-akshamy.kz Primeminister.kz سايتىنا سىلتەمە جاساپ.
كەڭەس بارىسىندا ۇلتتىق ەكونوميكا ءمينيسترى الىبەك قۋانتىروۆ قوعامدىق تاماقتانۋ، ساۋدا، ءقوناقۇي قىزمەتتەرى، كولىك جانە اۋىل شارۋاشىلىعى سالالارىنداعى رەتتەۋشى اكتىلەرگە جۇرگىزىلگەن تالداۋدىڭ بازالىق شارتتارعا سايكەس كەلمەيتىن باسى ارتىق جانە ءبىرىن-بىرى قايتالايتىن ءبىرقاتار تالاپتاردى انىقتاعانىن مالىمدەدى.
الداعى ايلاردا تاعى التى باعىت بويىنشا، اقپارات جانە بايلانىس، كومپيۋتەرلىك باعدارلامالاۋ سالاسى، جىلجىمايتىن مۇلىكپەن جاسالاتىن وپەراسيالار، جيناقتاۋ، تاۋ-كەن ونەركاسىبى جانە قۇبىر كولىگىنىڭ قىزمەتىنە تالداۋ جۇرگىزۋ جوسپارلانعان.
پرەمەر-مينيستر قازىرگى ۋاقىتتا بيزنەسكە كوپتەگەن فورمالدى تالاپتار قويىلعانىن اتاپ ءوتتى. ولاردى ءتيىستى باقىلاۋدى قامتاماسىز ەتۋگە زيان كەلتىرمەيتىندەي ەتىپ الىپ تاستاۋعا بولادى.
ءاليحان سمايىلوۆ مۇنداي تالاپتاردىڭ بولۋى ەلدەگى ىسكەرلىك احۋالعا كەرى اسەرىن تيگىزەتىنىن، سوندىقتان ورتالىق مەملەكەتتىك ورگانداردىڭ «اتامەكەن» ۇكپ-مەن بىرلەسىپ، رەتتەۋشى اكتىلەرى قىسقارتۋ بويىنشا جۇمىس جۇرگىزۋى ءتيىس ەكەنىن اتاپ ءوتتى.
«مەملەكەت باسشىسى ءبىزدىڭ الدىمىزعا بيزنەسكە كوبىرەك ەركىندىك بەرۋ مىندەتىن قويدى. بۇل – جاڭا ەكونوميكالىق ساياساتتى قالىپتاستىرۋ اياسىنداعى ۇكىمەت جۇمىسىنىڭ باستى باعىتتارىنىڭ ءبىرى. تەكسەرۋشى ورگانداردىڭ فورمالدى بەلگىلەرىنە قاراپ بيزنەستى جاۋاپكەرشىلىككە تارتۋعا مۇمكىندىگى بولماۋى ءتيىس»، - دەدى ءاليحان سمايىلوۆ.
وسىعان بايلانىستى پرەمەر-مينيستر ءتيىستى ورگاندارعا قايتا قاراۋ جانە قىسقارتۋ ارقىلى قازاقستاندىق نورماتيۆتىك-قۇقىقتىق بازانى باسى ارتىق تالاپتاردان تازارتۋ جونىندەگى جۇمىستى جانداندىرۋدى تاپسىردى.
سونداي-اق، ءاليحان سمايىلوۆ سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ مەملەكەتتىك باقىلاۋ مەن قاداعالاۋدى قامتاماسىز ەتۋ كەزىندە تاۋەكەلدەردى باسقارۋدىڭ اۆتوماتتاندىرىلعان جۇيەسىن قۇرۋ بويىنشا تاسىلدەرىن ماقۇلدادى.
«تەكسەرۋشى ۆەدومستۆولار بۇزۋشىلىقتاردىڭ ءقاۋپى جوعارى بولعان كەزدە ارەكەت ەتۋى ءتيىس. بيزنەسكە اكىمشىلىك جۇكتەمەنى ازايتۋ جانە تاۋەكەلدەردى باسقارۋ جۇيەسىن ىسكە قوسۋ – جۇرگىزىلىپ جاتقان رەفورماداعى نەگىزگى قادامدار. ورتالىق مەملەكەتتىك ورگانداردىڭ باسشىلارىنا وسى جۇمىستىڭ ناتيجەلەرى ءۇشىن جەكە جاۋاپكەرشىلىك تۋرالى تاعى دا ەسكەرتەمىن»، - دەپ تۇيىندەدى پرەمەر-مينيستر.