وتكەن جىلى 130 مىڭنان استام تۇرعىن ءۇي سالىنعان.
يندۋستريا جانە ينفراقۇرىلىمدىق دامۋ ءمينيسترى مارات قارابايەۆتىڭ ايتۋىنشا، بيىل رەسپۋبليكادا 143،5 مىڭ تۇرعىن ءۇيدى پايدالانۋعا بەرۋ جوسپارلانىپ وتىر، دەپ حابارلايدى Almaty-akshamy.kz
ۆەدومستۆو باسشىسىنىڭ سوزىنشە، بىلتىر ەلىمىزدە 130 مىڭنان استام تۇرعىن ءۇي سالىنعان.
"تۇرعىن ءۇي قۇرىلىسىنا ينۆەستيسيالار وتكەن جىلمەن سالىستىرعاندا 16،8 %-عا ءوسىپ، 2 ترلن 900 ملرد تەڭگەنى قۇرادى. مەملەكەتتىك ينۆەستيسيالار ەسەبىنەن 17 مىڭ 300 پاتەر سالىنىپ، 10 مىڭ 500 جەڭىلدەتىلگەن نەسيە بەرىلدى. تۇرعىن ءۇيدى ىسكە قوسۋدىڭ جالپى رەسپۋبليكالىق جوسپارلى كورسەتكىشى 101،8 %-عا ورىندالدى. استانا (+18،5 %) جانە الماتى (+14،7 %) قالالارىنىڭ اكىمدىكتەرى جوسپارلى كورسەتكىشتى اسىرا ورىندادى"، - دەدى ول ۇكىمەت وتىرىسىندا.
مارات قارابايەۆ 8 ءوڭىر تۇرعىن ءۇيدى پايدالانۋعا بەرۋ جوسپارىن ورىنداماعانىن اتاپ ءوتتى. ونىڭ ىشىندە ۇلىتاۋ (52،8%)، سولتۇستىك قازاقستان (74،8%) جانە اتىراۋ (86،8 %) وبلىستارىنىڭ كورسەتكىشتەرى ەڭ تومەن.
"بيىل 15 ملن 300 مىڭ شارشى مەتر تۇرعىن ءۇيدى (143،5 مىڭ تۇرعىن ءۇي) پايدالانۋعا بەرۋ جوسپارلانعان. جوسپارلى كورسەتكىشتەر وڭىرلەرگە جەتكىزىلدى"، - دەپ قورىتىندىلادى مينيستر.