جىل باسىنان بەرى ەلىمىزدە بالالاردىڭ قاتىسۋىمەن 700-دەن استام جول كولىك وقيعاسى تىركەلگەن.
بۇل تۋرالى ىشكى ىستەر مينيسترلىگىنىڭ اكىمشىلىك پوليسيا كوميتەتىنىڭ باسقارما باسشىسى اسەت وسپانوۆ ءمالىم ەتتى، دەپ حابارلايدى almaty-akshamy.kz.
«جاز مەزگىلىندە بالالاردىڭ قاۋىپسىزدىگىنە ەرەكشە ءمان بەرىلەدى. سەبەبى كانيكۋل كەزىندە ولاردىڭ بوس ۋاقىتى كوپ. كەيدە بالالار جول قاۋىپسىزدىگى ەرەجەلەرىن ساقتاماي جاتادى. اتا-اناسىنا قاراپ بوي تۇزەيدى، مىسالى، اتا-انا جول بويىن كەسىپ وتە سالسا، ونى كورگەن بالا قايتالايدى. جىل باسىنان بەرى بالالاردىڭ قاتىسۋىمەن 700-دەن استام جول كولىك وقيعاسى تىركەلدى»، - دەدى اسەت وسپانوۆ ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
كوميتەت باسشىسىنىڭ ايتۋىنشا، جول قاۋىپىزدىگىن قامتۋ ماقساتىندا ءبىرقاتار ءىس-شارا اتقارىلىپ جاتىر.
«جول-كولىك وقيعالارىنىڭ الدىن الۋ ماقساتىندا جىل سايىن «نازار اۋدارىڭىز، بالالار!»، «ءقاۋىپسىز جول»، «مەكتەپكە جول» تاعى سول سياقتى پروفيلاكتيكالىق شارالار وتكىزىلەدى. مىسالى، 15-31 مامىر ارالىعىندا ەل كولەمىندە «نازار اۋدارىڭىز – بالالار» ءىس-شاراسى ءوتتى. ماقساتى-بالالارعا جول-كولىك ەرەجەلەرىن ۇيرەتۋ، ءقاۋىپسىزدىڭ ماڭىزدىلىعىن ءتۇسىندىرۋ»، - دەيدى ول.
ودان بولەك، ءىىم وكىلى بالالاردى تاسىمالدايتىن اۆتوبۋستاردىڭ تالاپقا سايكەستىگى تەكسەرىلەتىنىن ايتتى.