ەرتەڭ ماجىلىستە «حالىقتىڭ شامادان تىس كرەديت الۋىن ازايتۋ جانە قارجىلىق ساۋاتتىلىقتى ارتتىرۋ» تاقىرىبىندا پارلامەنتتىك تىڭداۋ وتەدى. وسى تىڭداۋعا قاتىستى ءماجىلىس دەپۋتاتى بەرىك بەيسەنعالييەۆ پىكىر ءبىلدىردى، دەپ حابارلايدى اlmaty-akshamy.kz ءماجىلىس پالاتاسىنىڭ باسپا ءسوز قىزمەتىنە سىلتەمە جاساپ.
«جالپى شامادان تىس نەسيە الۋدى ازايتۋ جانە قارجىلىق ساۋاتتىلىعىن ارتتىرۋ وزەكتى بولىپ تۇر. ويتكەنى بىزدە ميلليونداعان ادام نەسيە الدى. رەسمي دەرەكتى سويلەتسەك، بۇگىندە جەكە تۇلعالاردىڭ نەسيە پورتفەلى 18 تريلليون تەڭگەدەن اسادى. سونىڭ تەڭ جارتىسى تۇتىنۋشىلىق كەپىلسىز نەسيە – 9 تريلليون، 5 تريلليون 600 ميلليارد تەڭگە - يپوتەكا، اۆتو نەسيە كولەمى 2 تريلليون تەڭگەدەن اسادى. وسى ءۇش نەسيەلىك ءونىم جەكە تۇلعالاردىڭ نەسيەلىك پورتفەلىنىڭ 90 پايىزىنان اسىپ تۇر. 18 تريلليون تەڭگە نەسيەنى 8،5 ميلليون ازاماتىمىز راسىمدەپ العان. مۇنىڭ ىشىندە 1 ميلليون 800 ازامات نەسيەسىن ۋاقىتىندا قايتارا الماي ءجۇر، بۇلاردىڭ بەرەشەگى - 2 تريلليون تەڭگە. بۇگىندە نەسيە بەرەتىن بانكتەردىڭ سىياقىسىنىڭ پايىزى تىم جوعارى. بانكروتتىق تۋرالى زاڭ قابىلدانىپ قولدانىسقا ەنگىزىلگەن ناۋرىز ايىنان باستاپ 67 مىڭنان استام ادام ءوتىنىش جازعان. ونىڭ ىشىندە 4 مىڭعا جۋىق ازاماتتىڭ نەسيەسى بانكروتتىق دەپ تانىلدى. بۇل نەنى كورسەتەدى، ءوتىنىش بەرگەن ادامداردىڭ تەك 6 پايىزى عانا بانكروتتىق ستاتۋسىن الدى دەگەن ءسوز. وسى 4 مىڭ ادامنىڭ ىشىندەگى 140 بورىشكەردىڭ ءارقايسىنىڭ جالپى قارىز سوماسى 150 مىڭ تەڭگەدەن اسپايدى. 18 ادامنىڭ موينىندا تولەي الماي جۇرگەن قارىزى 50 مىڭ تەڭگەدەن تومەن. 4 ادامنىڭ بەرەشەگىنە ءتىپتى كۇلەسىز – 4 مىڭ تەڭگە. مۇنىڭ ءبارى ەلىمىزدە كەي ازاماتتاردىڭ قارجىلىق ساۋاتتىلىعى تومەن ەكەندىگىنىڭ ايقىن كورىنىسى. مۇنى نە ءۇشىن ايتىپ وتىرمىن؟ الگى 4 مىڭ تەڭگە بەرەشەگى بار ادام بانكروتتىق دەگەن ستاتۋستى العانى ءۇشىن ەندى 5 جىل بويى ەشقانداي نەسيە راسىمدەي المايدى، شەتەلگە شىعۋىنا تىيىم سالىنادى. وسىنداي ولقىلىققا قاراپ بانكروتتىق تۋرالى زاڭدى ءالى دە پىسىقتاۋ كەرەك دەپ ويلايمىن»، دەدى ب.بەيسەنعالييەۆ.